Innarluutilinnut tapersersortinngortut 21-it

Qaasuitsup Kommuniani innuttaasunut innarluutilinnut tapersersortit 21-t oktobarip ulluisa 25-anni tapersersortinut, meeqqanik, inuusuttunik inersimasunillu annertuumik innarluutilinnik sullitaqartuusunut ilinniartitaanermik nutaamik naammassinnissimanerminnut uppernarsaatissatik tigussavaat. Ilinniagaqarsimanermut uppernarsaatinik tunniussineq Hotel Acticimi pissaaq.

Tapersersortitut ilinniartitaaneq nutaaq arfinilinnik immikkoortortaqarpoq ullunilu 29-ni ingerlasarluni. Tamatumani pikkorissartut namminneq piginnaasaminnik paasinneqqilersarput, innuttaasunik innarluutilinnik attaveqaqateqarsinnaalersarput allatullu attaveqaqateqariaaseqarnissamut ikorfartuutaasinnaalersarlutik, kiisalu innarluutilinnut tunngasuni ulluinnarni sulinerminni aaqqiagiinngittoqarneranik aaqqiiniarsinnaanngorlutik.

”Ilinniartitaanermut nutaamut soqutiginnittoqarsimasorujussuuvoq. Qinnuteqartitsinermi siullermi qinnuteqartut 90-it sinneqarput taamaammallu naammagisimaarnartorujussuuvoq. Tapersersortinut ilinniartitsineq tulleq 2015-imi Kommune Kujallermi neqeroorutigineqassaaq. Ukiumut atuaqatigiinnik ataatsinik ilinniartitsisarnissarput anguniagaraarput, Naja Rosing Fleischer IPIS-imeersoq oqaluttuarpoq.

Tapersersortitut ilinniartitaaneq pingaartumik ilinniarsimanngitsunut sammititaavoq, kii-salu Innarluutillit Pillugit Ilisimasaqarfiup Siunnersuisarfiutigisup Ilaqutariinnermut Inatsisinillu Atuutsitsinermut Naalakkersuisoqarfimmiittup Ilulissanilu Perorsaanermik Ilinniarfiup akornanni suleqatigiinnikkut aaqqissugaalluni.

 

Paasisaqarnerorusuttut attavigisinnaavaat Karen Joelsen Kristensen, Innarluutillit Pillugit Ilisimasaqarfimmi Siunnersuisarfiutigisumi siunnersorti, mobil 54 88 67 imaluunniit e-mail karj@nanoq.gl.