Umimmaat 19-it Nanortallip timaanut nuunneqartut

Kommune Kujalleq Aalisarnermut, Piniarnermut Nunalerinermullu Naalakkersuisoqarfik suleqateqarluni umimmaat 19-init Ivittuunit Nanortallip timaanut, Sermillip qinnguanut, aggustip 16-iannit 19-iannut nuunneqarput.

Taamaalilluni Kommune Kujallermi inuussutissarsiutigalugu piniartut, umimmaat amerlippata, kommuniminni siunissami umimmanniartalersinnaalissapput.

Maannakkut umimmaat eqqissisimatitaalluinnarput.

Kommune Kujallermi piniartut ullumikkut umimmanniarneraangamik Ivittuuliartariaqartarput.

Ilisimaneqartutut Ivittuut Kommuneqarfik Semersuumiippoq.

Naalakkersuisoqarfik umimmaat nuunneqarnissaasa pilersaarusiornerini piumasaqarsimavoq Sermillip qinnguata naasoqarnera misissuiffigineqassasoq, umimmaat tamanna siunissami neriartarfigisussaammassuk.

Naalakkersuisoqarfik nuussinissamut aamma piumasaqarsimavoq immikkut aqutsinissamik pilersaarusiortoqassasoq nunatsinnilu uumasut nakorsaqarfia inuussutissalerinermullu oqartussaqarfik peqataatinneqassasoq.

Pilersaarutit naapertorlugit umimmaat 30-it nuunneqartussaagaluarput.

Umimmannik nuussisut aqqaneq marluupput, tassaallutik uumasut nakorsaat ataaseq uumasut nakorsaqarfianeersoq inuussutissalerinermut oqartussaqarfimmeersoq, uumasullu nakorsaat ataaseq avataaneersoq.

Piniarnermut nakkutilliisut marluk Kalaallit Nunaanni Aalisarsinnaanermut Nakkutilliisoqarfimmeersut, Kommune Kujallermi sulisut, angallammeersullu Usisumeersut.

Umimmaat nuunneqartut tassaapput angutivissat aqqaneq marluk, arnavissat arfineq marluk.

Umimmaat ataatsimik marlunnillu ukioqartuupput.

Pinngortitaleriffik piumasaqarsimavoq arnavissat angutivissallu amerlaqatigiissinniarneqassasut.
Umimmaat piujuaannartitsineq tunngavigalugu siunissami piniarneqartalissapput.

Umimmaat Kommune Kujallermit nakkutigineqartassapput.

 

Paasissutissat sukumiinerusut uunga saaffiginninnikkut pissarsiarineqarsinnaapput Immikkoortortaqarfimmi pisortaq Amalie Jessen, amalie@nanoq.gl, tlf. 34 53 04