Qaanaami qaqortanik qilalugarniarneq unitsinneqarallarpoq

Qaanaap aqutsiveqarfiani qaqortanik qilalugarniarneq unitsinneqarallarpoq

 

Aqutsiveqarfimmi Qaanaami qilalukkat qaqortat pisarinerinut atatillugu  nalunaarsorneqartarneri amigarmata qaqortanik qilalugarniarneq unitsikkallarneqarpoq.

Pisanik arlaleriarluni nalunaarsuisoqartannginneq pisassiissutinik sippuisoqarsinnaaneranik kinguneqarsinnaammat  Aalisarnermut, Piniarnermut Nunalerinermullu Naalakkersuisoqarfiup Qaasuitsup Kommunia suleqatigalugu Qaanaap aqutsiveqarfiani qilalukkanik qaqortanik piniarneq unitsikkallarpaat.

Naalakkersuisoqarfiup kommuni piumaffigaa qaqortanik piniarsinnaanermut akuersissutit tamaasa kommunimut  utertinneqassasut misissuinerullu naammassineqareernissaata pisanillu nalunaarsuinerit tamaasa tiguneqareernissaasa tungaanut atorunnaarsinneqarallassallutik.

Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat naapertorlugu pisat, saniatigut pisat pisassallu sapinngisamik piaarnerpaamik pisanik immikkut nalunaartussaatitaanermi immersugassaq atorlugu nalunaarutigineqassapput.

Naalakkersuisoqarfimmit erseqqissaatigineqassaaq pisassiissutigineqartut kommunimit qularnaatsumik akisussaaffigineqartussaammata, pisassiissutigineqartut aamma sipporneqannginnissaat akisussaaffigineqarmat, tamakkerneqarpatalu piniarneq piaartumik unitsinneqassammat.

Qaanaami ukiuni sisamani teknikikkut pisassiiffiusuni ukiut siulliit ingerlaneranni  qilalukkanik qaqortanik sippuilluni pisaqartoqarsimaneq kingunerissavaa ukiuni kingulliusuni ikittuinnarnik pisassiissuteqartoqarnissaa.

Nalunaarut atuuttoq naapertorlugu pisap nerisassartai atorneqarsinnaasullu allat tamarmik angerlaanneqarlutilluunniit qimatulineqassapput. Pilaffiusimasoq perlukuiarneqarsimassaaqt.

Naalakkersuisoqarfimmit piniartunut erseqqissaatigineqassaaq pisanik amigartumik nalunaarsuisarnerup kingunerisinnaammagu qilalukkanik qaqortanik qernertanillu siunissami pisassiisarnernut sunniuteqarsinnaammat.

Annertunerusumik paasissutissat Immikkoortortami pisortamut Amalie Jessen, amalie@nanoq.gl

tlf. 345304-imut saaffiginnittoqarsinnaavoq.