Kiffartuunneqarnissamut isumaqatigiissutit maannakkut atuuttut sivitsorneqassapput

2015-imi timmisartuussinissaq ersarissitinneqarmat Naalakkersuisut naammagisimaarpaat.

Naalakkersuisut septembarip 24-ni suliaqartuusussanik annertuumik isumaqatiginninniarnerit inerneri Akileraartarnermut Aningaasaqarnermullu Ataatsimiititaliamut akuerisassanngorlugit nassiussaat aalajangiinermut tunngaviupput.

Isumaqatiginninniarneri inernerisa malitsigisaanik, immikkut aningaasaliinissamik pisariaqartitsiviunngitsumik, kiffartuussineq annertunerulissaaq aammalu pensionisialinnut akikillisaasoqartalissalluni.

Qinersinissamik nalunaaruteqarnerup kingorna isumaqatigiissutit atuutereersut ingerlateqqinneqarnissaat Akileraartarnermut Aningaasaqarnermullu Ataatsimiititaliap kissaatigisimavaa.

Taamaattumik Naalakkersuisut Akileraartarnermut Aningaasaqarnermullu Ataatsimiititaliap piumasaqarnera malillugu kiffartuunneqarnissamut isumaqatigiissutit atuuttut ukiumik ataatsimik sivitsorneqarnissaannik siunnersuut nassiuppaat.

Isumaqatigiissutit maannakkut billetsinut akiusut aallaavigalugit sivitsorneqassapput.

Taamaattumik ilaasut sivitsuinerup malitsigisaanik kiffartuussinermi imaluunniit billetsinut akini allannguutinik misigisaqassanngillat.

Akileraartarnermut Aningaasaqarnermullu Ataatsimiititaliap aaqqiissutissaq taanna 2015-imi 16,6 mio. koruuninik aningaasartuuteqarnerunermik malitseqartussaq, akueraa. Tamanna taamaaqataasinik IST-ip inerneranut sunnissaaq.

2015-imi neqeroortitsinermik nutaamik ingerlatsisoqassanersoq Naalakkersuisunngortussat isummerfigisussaassavaat.

 

Annertunerusumik paasisaqarusunnermi attaveqarfigineqassaaq Attaveqarnermut Naalakkersuisoq Vittus Qujaukitsoq, naalakkersuisoqarfimmi pisortaagallartoq Julie Præst Wilche aqqutigalugu uani oqarasuaat +299 551190 imaluunniit e-mail prw@nanoq.gl