Inatsisartunut allakkatigut qinersineq ullumi aallartippoq

Qinersineq

28. november 2014-imi Inatsisartunut qinersinermut allakkatigut qinersisinnaaneq ullumimiit aallartippoq.

 

28. november 2014-imi Inatsisartunut qinersinissamut atatillugu pappiaqqamik taasivimmik nassiussinikkut allakkatigut qinersinissamik periarfissaq ullumi tallimanngornermi 17. oktober 2014 aallartippoq.

Inuit nalunaarsorsimaffianni, tassa folkeregisterimi allakkatigut qinersisoqarsinnavoq. Allakkatigut taasissut kommunimi qinersisartup qinersisussat allassimaffimmiiffigisaanut nassiunneqassaaq. Nunaqarfinni inoqarfinnilu mikinerusuni allakkatigut taasinerit tunniunneqassapput inunnik nalunaarsuisup ikiortaanut.

Napparsimmavinni imaluunniit peqqissartarfinni paaqqutarineqartarfinniluunniit allani uninngasut aammalu pinerluuteqarsimasunik isumaginnittoqarfiup inissiisarfiani inissinneqarsimasut aamma allakkatigut taasisinnaapput.

Qinersisartut inoqarfinni mikinerusuni najugaqartut inummi Qinersinermik siulersuisut toqqagaanni allakkatigut taasisinnaapput.

Qinersisartut umiarsuarni Kalaallit Nunaanni angerlarsimaffeqartuniittut umiarsuup naalagaanit taassumaluunniit toqqagaanit taasisinneqarsinnaapput.

Silasiorfinni timmisartunullu mittarfinni il.il. allakkatigut taasisoqarsinnaavoq inummi Qinersinermut ataatsimiititaliamit piginnaatinneqartumi.

Qinersisartut Danmarkimiittut Savalimmiuniittulluunniit inuit nalunaarsorsimaffianni imaluunniit Kalaallit Nunaata sinniisoqarfiani Københavnimiittumi allakkatigut taasisinnaapput.

Qinersisartut Naalagaaffiup avataaniittut Danmarkip aallartitaqarfiini imaluunniit konsuleqarfiini taasisinnaapput.

Allakkatigut taasissut kommunimi qinersisartup qinersisussat allassimaffimmiiffigisaanut nassiunneqassaaq. Allakkatigut taasissut taasiartorfimmut qinersisartup qinersisussat allassimaffimmi nalunaarsorsimaffigisaanut ullormi qinersiffiusup inerlanneqarnera naatinnagu apuutereersimassaaq, imaappoq 28. november 2014 nal. 20.00 nallertinnagu. Taamaattumik siunnersuutigineqarpoq allakkatigut taasinissaq piffissaalluartillugu ingerlanneqassasoq.

Annertunerusumik paasisaqarusukkaanni inuit nalunaarsorsimaffiat, folkeregisteri saaffigineqarsinnaavoq.

Nuuk ulloq 17. oktober 2014

Attaveqarfissat

Qinersinermut Ataatsimiititaliaq, Oqar. 34 50 00.