Naalakkersuisut qinersisoqarnissaata tungaanut qanoq iliorsinnaanerat

Inatsisartunut qinersisoqarnissaata suaarutigineqarneranut atatillugu Naalakkersuisut tunuanngillat.

Kisianni Naalakkersuisut Namminersorlutik Oqartussat suliassaasa unittuunnginnissaat qulakkeerniarlugu pisariaqartitsineq aallaavigalugu taamaallaat iliuuseqarsinnaapput.

Naalakkersuisut assigiinngitsut pillugit aalajangiisinnaassusaat utaqqiisaasumik aningaasaliissutitut inatsimmi annertusineqarpoq ukunani:

  • Aningaasaliissutit aalajangiussaareersut iluanni suleqatigiinneq pillugu ataatsimut nalunaarummik, ilinniartitaaneq pillugu piffissami 2014-2020 suleqatigiinnissamik isumaqatigiissutisamik aamma aalisarneq pillugu piffissami 2016-2020 isumaqatigiissutissamik EU-lu isumaqatiginninniarnerit nanginnissaat pillugu.
  • Inatsisartut Aningaasaqarnermut Akileraartarnermullu Ataatsimiititaliaat akuersitillugu sanaartukkat ingerlasut, sanaartugassatut pilersaarutit aamma Namminersorlutik Oqartussat inissiaataasa aningaasaliiffigeqqinnissaat nutarternissaallu pilersaarusiornissaannut aallartinnissaannullu tunngasut. 
  • Inissiat attartortittakkat tuninissaannut tapiissuteqarluni inissiat utertinnissaannut taakkulu isumaginerinut aningaasartuutit pillugit.
  • Inatsisartut Aningaasaqarnermut Akileraartarnermullu Ataatsimiititaliaat akuersineratigut ilaasunik, allakkanik nassiussanillu Nunatsinni assartuineq pillugu sullissisunik isumaqatigiissuteqarnissaq pillugu.
  • Akuersissutinik nalunaaruteqarneq aamma aatsitassanut inatsit naapertorlugu akuersissutigineqareersut suliarineqarnerisa ingerlatiinnarnissaat pillugit.
Naalakkersuisut aalajangiisinnaassusaat aamma annertusisinneqarsinnaavoq partiini siuttut qinikkat imaluunniit Inatsisartuni gruppeni siuttut tapersersuinerisigut.