Namminersorlutik Oqartussat IT-anik ingerlatsisussarsiorneq

Namminersorlutik Oqartussat IT-anut tunngatillugu ingerlatsinermut maanna isumaqatigiissut ulloq 31-12-2014 atorunnaartussaammat Digitalimik sullissinermut Aqutsisoqarfiup unammissutigitippai 1) IT-mik kiffartuussinissaq ikiuisarnissarlu aamma 2) inatsit naapertorlugu It-mik ingerlatsinissaq attaveqaateqartitsinissarlu.

Digitalimik sullissinermut Aqutsisoqarfiup suliarinnittussarsiuussineq pitsaanerpaamik periuseqartarnissamik aamma nalinginnaasumik periuseqartarnissamik piumasaqaatitalerlugu suliaraa. Namminersorlutilli Oqartussani IT-mik ingerlatsinissaq suliassaavoq ajornaatsuinnaanngitsoq, nunamilu it-mik tunisisartut assigiinngitsut suliassaqarfiup taassuma iluani assigiinngitsunik unammillersinnaanermillu piginnaasaqarput.

Taamaammat Digitalimik sullissinermut Aqutsisoqarfiup toqqarpaa suliarinnittussarsiuussinermini arlalinnut sammisumik tunisisussanut periusissiorniarluni, tassa najukkani tunisassiortut amerlanerit periarfissinniarlugit suliassaq tamakkerlugu ilaannakorluguluunniit tunngaviusumik piginnaasaqarfimminnik neqerooruteqarnissaannut.

Periusissaq taanna toqqarneqarpoq Namminersorlutik Oqartussat aaqqissuussaanerat najukkanilu it-mik niuerneq ataatsimut inerisarniarlugit.

Tamatuma nassataanik Digitalimik sullissinermut Aqutsisoqarfiup 2014-imi ukiakkut suliarai killilimmik suliarinnittussarsiuussinerit marluk, taakku nunatsinni niuernermut aaqqissuussaq malillugu najukkani tunisassiortunut taamaallaat atuuttussiaapput. Suliarinnittussarsiuussinerni marlunni taakkunani pineqarput:

1)    IT-mik kiffartuussinissaq ikiuisarnissarlu

2)    IT-mik ingerlatsinissaq attaveqaateqartitsinissarlu

 

Neqeroorut 1 – IT-mik kiffartuussinissaq ikiuisarnissarlu

Suliarinnittussarsiuussineq marlunnut avinneqarpoq, periarfissaavorlu aappaannaanut marluutillugilluunniit neqerooruteqarnissaq.

Neqerooruteqarnissamut tunniussiffissatut killiliunneqarpoq ulloq 5. september 2014.

Najukkani tunisassiortut sisamat qinnuigineqarput suliassamut neqerooruteqaqqullugit.

Tunisassiortut marluk neqerooruteqarniaratik aalajangerput.

Neqeroorutip 1-ip imai marluusut pillugit COMBY A/S isumaqatigiissummik atsioqatigineqarpoq.

Neqeroorut 2 – IT-mik ingerlatsinissaq attaveqaateqartitsinissarlu

Suliarinnittussarsiuussineq arfinilinnut avinneqarpoq, periarfissaavorlu ataatsimut, arlalinnut tamanulluunniit neqerooruteqarnissaq.

Neqerooruteqarnissamut tunniussiffissatut killiliunneqarpoq ulloq 29. september 2014.

Najukkani tunisassiortut arfinillit qinnuigineqarput suliassamut neqerooruteqaqqullugit.

Tunisassiortut pingasut neqerooruteqarniaratik aalajangerput. Suliarinnittussarsiuussineq suli naammassineqanngilaq.

Suliarinnittussarsiuussinernut marluusunut tunniussinissamut piumasaqaatit assigiipput:

  • Aningaasaqarneq – 25 %
  • Akigititat aalajangersimasut allanngorartullu akornanni nikingassutaasoq – 15 %
  • Suliassamik paasinninneq – 20 %
  • Pitsaassuseq – 25 %
  • Najoqqutassat – 10 %
  • CSR – 5 %

 

Digitalimik sullissinermut Aqutsisoqarfimmut pingaaruteqarpoq suliarinnittussarsiuussinerit arlallit suliarineri akikinnerpaatitsinissamut tunngassuteqaannannginnissaat, tassa kiffartuussinernik aqutsineq pitsaassuserlu Namminersorlutik Oqartussanut inuiaqatigiit piumasaqaataannik malinnittussanut pingaaruteqarluinnarmata.

Digitalimik sullissinermut Aqutsisoqarfiup maluginiarpaa tusagassiuutit apeqqusersimagaat TELE-POST A/S-p unammillertini suliassamik neqerooruteqarneranni naammaginanngitsumik unammillersimagai.

Digitalimik sullissinermut Aqutsisoqarfiup isumaa malillugu suliaq unammilleqatigiinnermut oqartussaasunut anngunneqassappat tamanna taakku aalajangiiffigissagaat.

Tassa Digitalimik sullissinermut Aqutsisoqarfiup suliarinnittussarsiuussinerit taakku marluk paasinartumik ingerlatsinissami maleruaqqusat atuuttut malillugit naammassiniarlugit suliarai.

Tunisassiortut tunniussinissamut piumasaqaatit naapertorlugit iluaqutaanerpaamik neqerooruteqartutut nalilerneqartut Digitalimik sullissinermut Aqutsisoqarfiup toqqassavai.