Nuummit Paamiunut saattuartassat ilaneqarput

Naalakkersuisut aqutsiveqarfimmut Nuuk-Paamiut saattuartassat 250 tonsinik ilaneqassassut akuersissutigaat. Tamaani saattuartassat 1.200 tonsiulerlutik.

Aqutsiveqarfimmut ukiumut saattuartassiissutigineqartut 950 tonsiupput. Saattuartassiissutigineqartut septembarimi nungunneqarput.

Naalakkersuisut aqutsiveqarfimmi saattuartassanik ilasipput saattualeriffissap nutaap qanittukkut ammartussap tunitsivigineqarsinnaanissaa qulakkeerumallugu, aalisartullu ukiup sinneranut aalisarsinnaanissaat aamma qulakkeerumallugu, Nuummi saarullinniarneq qaangiutilermat.

Aalisarnermut akuersissuteqartarneq pisassiissuteqartarnerlu pillugit nalunaarut juulip qiteqqunnerani allanngortinneqarpoq, tamatumani 3-sømilinut killeqartitsinerup avataani imartami nutaanik periarfissiisoqarluni.

Erseqqissaatigineqarpoq saattuartassanik ilasineq pisassiissutitut inassutigineqartut qaangerneqanngimmata.

Inassutigineqarpoq sinerissap qanittuani aamma avataasiortuni saattuarniarnermi aqutsiveqarfimmi Nuuk-Paamiut pisassiissutit 1.200 tonsiussasut.

 

 

 

Attavigineqarsinnaasoq: Aalisarnermut, Piniarnermut Nunalerinermullu Naalakkersuisoqarfik, immikkoortortaqarfimmi pisortaq Emanuel Rosing. E-mail: Emanuel@nanoq.gl