Aalisarnermut Siunnersuisoqatigiit: Iliuuseqarnissaq isumaqatigiissutaasoq

Aalisarneq pillugu Siunnersuisoqatigiit sisamanngorneq ulloq 9. oktober ataatsimiinnerminni Kitaani kalaallit saarullinniarneranni aalisarnikkut sakkortusisamik iliuuseqartoqarnissaannik GA-p siunnersuutaa oqallisigaat. Siunnersuut raajanut ikiliartornissaannik siunnersuuteqarnermit isumassarsiaavoq, tassani ilaatigut tunngavigineqarluni, kitaani naatsorsuutigineqartoq saarullinnit ukiumut raajat 15000 tonsit nerineqartartut - Raajat, aalisartut suliffissuillu taamalu inuiaqatigiit kalaallit tamarmiusut pissarsiarinngitsoortagaat.

Ukioq maannamut siunnersuutikkut kaammattuutigineqarsimavoq annertunerpaamik 80000 tonsinit aalisartoqarsinnaassasoq, ukiup tullianut biologit aalisartoqarnissaanut siunnersuutigaat 60000 tonsit, tassalu 25%-imik annikilleriartoqassalluni.

Ataatsimiinnerup takutippaa, GA-mit pilersaarut saqqummiunneqartoq tamanit isumaqataaffigineqarluni sulissutigineqaqqissasoq, taannalu siumoortumik KNAPK-mit, Royal Greenlandimit aamma Polar Seafood Greenlandimit tapersersorneqarsimasoq.

Taamaasilluni suleqatigiissitamik pilersitsisoqassaaq, taannalu novembarip qiteqqutinnginnerani aaqqiissutissamik siunnersuuteqassaaq ukiumi 2015-imi raajarniarnermi pisassanik kiisalu aalisakkanik allanik pisassanik Aalisarnermi Piniarnermi Nunalerinermullu Naalakkersuisoqarfimmut saqqummiunneqartussanik. Suleqatigiisitap GA-mit siunnersuutip aalajangersimasumik piviusunngortinneqarnissaanut aallaaviussaaq.

Taamatuttaaq isumaqatigiissutigineqarpoq, siunnersuutip kitaani raajarniarnermi MSC-mik piujuartitsilluni uppernarsaasersuineq 2013-imi anguneqartoq akornusersorneqassanngitsoq.

GA-mit pilersaarutissatut missingiut imatut oqariartuuteqarpoq, tassalu saarullinnut  aqutsinissamut pilersaarutaasoq allanngortinneqassasoq, taamaasilluni sumiiffinni Kitaata avataani saarulleqassutsip pilerseqqikkiartuaaqqinnerani sukkassuseq annikillisinneqarluni. Maannakkorpiaq biologit naatsorsorsimavaat, kitaani saarulleqassuseq aalisagaqassutsikkut 200000 tonsingajannik annertussuseqartoq. Ukiumoortumik 25000 tonsinik aalisarnerup kingunerissavaa aalisagaqassutsimit 11 %-ngajannik ilanngartuisinnaaneq, tamannalu naammaginakannersunik uumassuseqarnermut sinaakkusiussat iluini illersorneqarsinnaasutut isigineqarpoq.

Aalisarneq pillugu Siunnersuisoqatigiinnut Siulittaasoq

Petrus H. Biilmann