Naqqiut

Sermitsiaq.AG allaaserisami ”Nunaoil: Siulersuugallartussat ivertinneqalerunarput” arfininngornermi nal. 15.01-imeersumi allapput ”misissorneqartoq utaqqiisaagallartumik allaffissornikkut siulersuisussanik ivertitsisoqarsinnaanersoq. Tamanna Inuit Ataqatigiit Nunaoil A/S inissisimanera pillugu partiit siulittaasuisa ataatsimiisinneqarnissaannik kissaateqareersullu pivoq”. Tamanna ilumuunngilaq.

Nunaoil aktieselskabiuvoq, taamalu aktieselskabit pillugit inatsisit selskabimilu malittarisassat naapertorlugit ingerlanneqarluni. Siulersuisut tunuarmatali Ingerlatseqatigiiffinnut Immikkoortortaqarfik inatsisinik malittarisassanillu misissuilerpoq aaqqiissutissamik ujaasilluni. Periarfissat ilagaat Naalakkersuisunut aamma Inatsisartunut ilaasortassat nutaat inissinnissaasa tungaannut utaqqiisaasumik allaffissornikkut siulersuisussanik toqqaasoqarsinnaanera. Taamannak qanittumi aaqqiisoqaratarsinnaavoq.

Aaqqiissutissarsiorneq Inuit Ataqatigiit partiit siulittaasuinik Nunaoilimi pisut pillugit ataatsimiititseqqusineranut attuumassuteqanngilaq.

Naalakkersuisut Siulittaasuata Naalakkersuisoqarfia