KNR-ip Sermitsiallu nittartagaanni paasissutissanut naqqiut

Siulersuisut tunuarnerannut tunngatillugu allaaserisani tulliuttuni paasissutissat kukkusut amigaataasullu makkuupput:

 

Sermitsiaq.AG

Allaaserisaq: Nunaoilimi aalassassimaartoqarpoq: Siulersuisut ingerlaannartumik tunuartut

Allaaserisap qallunaatuuata qeqqata tungaani allassimavoq ”Bestyrelsen har anmodet selvstyret om en analyse af besparelser….” Tamanna ilumuunngilaq – Namminersorlutik Oqartussanit tusagassiorfinnut nalunaarummi allassimasutut, pilersaarutaasut naapertorlugit Nunaoilip 2018-imit ukiumut 10 million koruuninik aningaasaliiffigineqartalernissaata 2017-imut siuartinneqarnissaanik selskabip noqqaassuteqarnerata Naalakkersuisunngortussanut Inatsisartunngortussanullu aalajangiiffigisassanngortitsinnginnerani, Namminersorlutik Oqartussat siulersuisunut piumasaqarput selskabimi aningaasartuutit ikilisarniarlugit misissueqqissaarlutillu iliuusissatut pilersaarusiussasut.

 

KNR.gl

Allaaserisaq: Nunaoil qaammaterpassuarni susinnaajunnaarsinnaasoq

Allaaserisap qulequtaaraani ”silittumik allannilimmi” oqaatigineqarpoq Nunaoilimi sulisut arfineq marluusut affaannanngortinneqarnissaat Namminersorlutik Oqartussanit ippassaq naalakkiutigineqarsimasoq. Tamanna ilumuunngilaq – Namminersorlutik Oqartussat naalakkiinngillat, susoqarsimanera tusagassiorfinnut oktobarip qulingiluaanni nalunaarummi allassimavoq.

Allassimavoq Namminersorlutik Oqartussani Ingerlatseqatigiiffinnut Allattoqarfimmi paatsiveerusimaartoqartoq. Tamanna ilumuunngilaq. Ingerlatseqatigiiffinnut Allattoqarfimmi paatsiveerusimaartoqanngilaq, taamannak allanneq tusagassiortup nammineq akisussaaffigaa.

Allaaserisap naggataani allassimavoq siulersuisut nungunnerat Naalakkersuisut Siulittaasuata Naalakkersuisoqarfiannit naalakkiineranit tunngaveqartoq. Tamanna ilumuunngilaq, tassami ataatsimiinnermit imaqarniliami allassimavoq, soorlu aamma Allakkiami kiisalu tusagassiorfinnut nalunaarummi – siulersuisut ataatsimiinnerup kingorna tunuarniuteqarput, ataatsimiinnermilu Namminersorlutik Oqartussat selskabimut siulersuisunulluunniit naalakkiinngillat, siulersuisulli piumaffigineqarput selskabimi sipaarniutissanik siunnersuuteqaqqullugit Naalakkersuisunngortussat ivertinneqarnissaannut piareersimasussamik, taamaalillutik siulersuisut noqqaassutaannik misissuinerannik il.il. Naalakkersuisut naliliisinnaaqqullugit.

 

Allaaserisap ”NunaOilip siulittaasorisimasaa: Uuliamut politikki imminut assortorfiusoq” qallunaatuuani

Titarnertaat pingajuanni allassimavoq ”Dagen efter Naalakkersuisut trak sig fra sine ansvarsposter…..” Oqaaseqatigiit kukkupput. Siulersuisut siulittaasuat 7. oktobari tunuarniuteqarpoq, siulersuisunullu ilaasortat pingasut 8. oktobari tunuarniuteqarlutik, tassa Naalakkersuisut qinersinissamik suaarutiginninnerannit ullut arfineq marluk qaangiummata.

Oqaaseqatigiit tullii: ”Uuliamik misissuinermik suliffeqarfiusup arfineq marlunnik sulisulimmi sipaarniartoqassasoq naalakkiutaannut ilaavoq, naalakkiut sulisut affaannanngortinneqarnissaannik sulisuuinnartussallu aningaasarsiaannik appaanermik imalik”. Tamanna ilumuunngilaq. Ataatsimiinnermi kingornalu allakkiami siulersuisut piumaffigineqarput sipaarniutissanik siunnersuuteqaqqullugit – Naalakkersuisunngortut aalajangiiffigisassaannik. Taamaammat naalakkiisoqanngilaq.

Titarnertaap tullia: oqaaseq naalakkiineq atoqqinneqarpoq… Namminersorlutik Oqartussanit selskabimut naalakkiisoqanngilaq. Akerlianik siulersuisut innersuunneqarput misissueqqissaaqqullugit sipaarniutissanillu siunnersuuteqaqqullugit.