Qimmit tallimat ukkatarinerlunneqartut toqunneqartut

Qeqertarsuup Tunuani nunaqarfimmi Ikamiuni kommunefogdep qimmit ukkatarinerlunneqartut tallimat toquttariaqarsimavai.

Uumasut nakorsaat Sanne Eline Wennerberg, Ilulissat, Qaasuitsup Kommuanit qimmit ukkatarineqanngitsut, sanigorsimaqisut aammali toquttariaqarsimasut pillugit piffissami kingullermi saaffigineqartarpoq.

Uumasut nakorsaat Ilulissani qimmilerisoq ilagalugu qimmit ataatsimut pigineqartut sisamat marlunngornermi oktobarip arfineq pingajuanni takusarsimavaat. Uumasut nakorsaat oqaluttuarpoq qimmit sisamaat toqoreersimasoq siumorsimallugu.

Qimmeq toqungasoq qimmiaqqanik arfinilinnik ilumittoq, sapaatip akunnera qaangiutsinnagu sarlialereersimassagaluarpoq.

- Qimmeq naartunermi nalaani naammattunik nerisinneqarneq ajorami toqusimavoq. Ammarterlugu misissorakku takusinnaavara tingui perlilertarsimanerminit sussaajunnaarsimapput, taakkuuppullu toqutigisai, Sanne Eline Wennerberg oqarpoq.

Qimmiutilik periarfissinneqarpoq qimmini nerisinnaassagai. Qimmimik naartusumik perlilertitsisimanini pissutigalugu politiinut suliassanngortinneqassaaq.

- Qimmini naalliutsitarisimavaa, uumasut nakorsaat oqarpoq, erseqqissaallunilu kommunimik politiinillu suliassanik taamaattunik suleqatigiilluarsimallutik.

- Qujanartumik piffissaagallartillugu kommunimeersumit takkuttoqarpoq, takkutiaanngitsuuppat qimmit toqunneqartariaqarsimallutik, qimmilli saloqaat, Sanne Eline Wennerberg oqarpoq.

Qaasuitsup Kommunia 10.000-it missaanni qimmeqarpoq. Sanne Eline Wennerberg kommunimit ilisimatinneqarsimavoq Uummannami politiit ilisimatitsisimasut Uummannap nunaqarfiisa ilaanni qimmeqartoqartoq qimmiminik ukkatarinnerluttumik.

- Taamaalilluni ukkatarinnerluttup qimmini perlilertikkunnaarlugit nerisittalersimavai.

- Qasigiannguani kommunip qimminik ukkatarinnerluttoq naammattuukkani peqqusimavaa qimmini nerisittassagai, uumasut nakorsaat oqarpoq.

Tamarmik suliassanngortinneqarneq ajorput

Uumasut nakorsaata nalileruminaatsippaa uumasunik naalliutsitsisarnerit amerleriarsimanersut ikileriarsimasulluunniit, suliassanngortinneqartartut tamarmik nalunaarsorneqarneq ajormata, naalliutsitsisulluunniit tamarmik naammattoorneqarneq ajormata.

- Nunani avannarlerni ilisimaneqarpoq uumasunik naalliutsitsinerit uumasuuteqartup alianartumik nalaataqarneranik pissuseqartartoq, tamannali nunatsinni taamaaqqajanngilaq, Sanne Eline Wennerberg oqarpoq, oqaluttuarlunilu qimmiutillit qimmiminnik nerisitsineq ajortut tassaakkajuttuusut piniariarlutik aallarsimasut, angalaartut sunngiffeqarlutilluunniit peqanngitsut.

- Taama pisoqartarnera nuannaarutissaanngilaq, tamatsinnut tusaamanerlutaalersarmat, qimmiminnik ukkatarinnilluartunut aamma tutsinneqartarluni.

Ukiulerpoq issitalertussaallunilu. Qimmit saloreeqisut meqqorluttullu issi sapersaatigissaqaat.

- Issilerpat qimminut saloqisunut imaannaanngitsussaavoq, orsoqannginnamik issimut akiuussutissaminnik, uumasut nakorsaat oqarpoq.

– Qimmeqassagaanni, taakkununnga ullut tamaasa akisussaassuseqartoqartariaqarpoq, Sanne Eline Wennerberg erseqqissaavoq.

 

Attavigineqarsinnaavoq: Sanne Eline Wennerberg, uumasut nakorsaat. E-mail: sawe@nanoq.gl

 

Asseq toqqorsivimmit.