Nunaoil A/S-imi siulersuisut tunuartut

Nunaoil A/S-imi siulersuisunut ilaasortat amerlanersaat, danskit ilaasortaatitaat minillugu, siulersuisuni sulinerminnit tunuarmata Namminersorlutik Oqartussat uppernarsarpaat.

Selskabimi siulersuisut sinnerlugit siulersuisunut siulittaasup, Naalakkersuisut Siulittaasuata Naalakkersuisoqarfiata, Ingerlatseqatigiiffinnut Allaffeqarfiup, Aningaasaqarnermut Naalakkersuisoqarfiup aamma Inuussutissarsiornermut, Aatsitassaqarnermut Suliffeqarnermullu Naalakkersuisoqarfiup akornanni sivitsortumik oqaloqatigiittoqareersorlu tunuarniutit takkupput.

Nunaoil A/S Namminersorlutik Oqartussat sinnerlugit, taamalu akileraartartut aningaasaataat atorlugit, sullissisuuvoq. Pilersaarutaasut naapertorlugit selskabimut 2018-imit ukiumut 10 million koruuninik tapiisoqartalernissaa 2017-imut siuartinneqarnissaa Nunaoil A/S-imit noqqaassutigineqarpoq. Tamanna tunngavigalugu selskabimi aningaasartuutit suuneri Namminersorlutik Oqartussat misissuiffigisimavaat saaffiginnissutip qisuariarfiginnginnerani allanik periarfissaqarnersoq paasiniarlugu.

Misissuinerup takutippaa aningaasartuutit qaffasissorujussuusut, ingammik aningaasarsianut aningaasartuutit selskabinut Namminersorlutik Oqartussanit pigineqartunut allanut sanilliullugit marloriaatingajammik qaffasinnerullutik. Taamaammat ukiumut 10 million koruuninik taperneqartalernissamut kissaatip Naalakkersuisunit aalajangiiffigisassanngortinnginneranni siulersuisut piumaffigineqarput aningaasartuutit qaffasinnerujussuat qanoq iliorluni appartinnissaannut siunnersuuteqaqqullugit.

Piumasaqaateqarneq ajoraluartumik siulersuisut tunuarnerannik kinguneqarpoq, tunngavilersuutigineqarluni Namminersorlutik Oqartussat piffissaanngitsukkut akuleruttut. Tamassuma kingunerisaanik siulersuisunik nutaanik toqqaanissaq siunertaralugu immikkut ittumik ataatsimeersuartoqartussanngorpoq.