Qinersisinnaatitaanermut malittarisassanik erseqqissaanissaq pisariaqarpoq

Ulluni kingullerni qularutigineqalersimavoq ilaatigut ilinniagaqartut Inatsisartunut qinersinermut ulloq 28. november 2014-imi qinersisinnaanissaannut periarfissaat pillugit. Tamanna ajuusaarnaraluartumik tamakku pillugit eqqortumik aalajangersakkat pillugit kukkusunik oqaaseqaateqartitsisimavoq. Taamaattumik Qinersinermut Ataatsimiititaliap allattoqarfiata qinersimavaa tusagassiorfinnut nalunaaruteqarnissani Inatsisartunut qinersinermi qinersissamaarnermut qinersisinnaatitaanermi malittarisassat erseqqissaatiginiarlugit.

Kalaallit Nunaanni Inatsisartunut qinersinermi qinersisinnaatitaassagaanni nalinginnaasumik qallunaatut innuttaassuseqartoqassaaq sivikinnerpaamillu qaammatini arfinilinni Kalaallit Nunaanni najugaqarsimassalluni.

Nunani allani aamma piffissami sivikitsumi najugaqaleruit, Kalaallit Nunaanni qinersisinnaatitaanerit annaassavat.

Kalaallit Nunaanni Inatsisartunut qinersisarneq pillugu Inatsisartut inatsisaanni nr. 9, 1996-imeersumi § 2 naapertorlugu tamanna atuutinngilaq ilinniagaqarnermut atatillugu nunani allaniikkuit (imaluunniit pissutsit allat pissutigalugit soorlu peqqinnissamut pissutsit pissutigalugit imaluunniit kalaaliullutit folketingimut ilaasortaaguit imaluunniit nunani allani Namminersorlutik Oqartussanut sinniisuuguit).

Taakkuali taakkulu katissimallugit aapparisaasa inooqataasalu Inatsisartunut qinersinermut qinersisinnaatitaanertik pigiinnarsinnaavaat tamanna pillugu inatsimmi § 22 imm. 1 naapertorlugu qinnuteqarsimagunik.

Piumasaqaataavorli, Kalaallit Nunaata avataanniinneq utaqqiisaagallassasoq, aammalu piffissami imminut ataannartumi sivikinnerpaamik ukiuni marlunni Kalaallit Nunaanni najugaqareersimasuunissat.

Qinersisussat allattorsimaffiannut ilanngunneqarsimanissaq ukiuni marlunni atuuffeqarpoq takuuk § 22 imm. 2. Piffissami sivisunerusumi aallaqqasimassaguit, qinnuteqaatit nutartertariaqassavat.

Aalajangersakkakkut qulakkeerneqarpoq, nuna qimassimasinnaagit ilaatigut ilinniagaqariartorlutit uterlutillu atasumik minnerpaamik ukiut marluk piffissami tamarmiusumi qinersisinnaatitaanerit pigiinnarlugu.

Taamaattumik qinersisussat allattorsimaffiannut ilanngunneqarsimasariaqarputit qinnuteqaatit tunniunnikuusimagukku akueritinnikuusimallugulu november 2014-imi qinersinissaq sivikinnerpaanik ukiunik marlunnik sioqqullugu.

Isumassarsiatsialaassaaq tamatuma misissornissaa Kalaallit Nunaanni kommunerisanni Qinersinermi Siulersuisunut saaffiginnissuteqarnikkut.

Nunami allami najugaqaruit § 2-milu piumasaqaatit eqquutsissimallugit, immersugassaq ”Inuit Kalaallit Nunaata avataaniikkallartunut qinersisussat allattorsimaffiannut ilanngunneqarnissaminnik qinnuteqarfissaat” immersussavat.

Immersugassaq uani aaneqarsinnaavoq www.naalakkersuisut.gl.

Immersugassaq kommunimut tunniunneqassaaq, kingullermik inuit allattorsimaffianni nalunaarsorneqarfigisimasannut.

INATSISARTUNUT qinersisinnaatitaanerit atorsinnaassagukku, ulloq qinersiviusussaq sivikinnerpaanik sapaatip akunnerinik pingasunik sioqqullugu qinersisussat allattorsimaffiannut ilanngunneqarsimassaatit.

Taamaammat sioqqutsillutit qinnuteqaatit nassiutissavat, taamaaliornikkut Qinersinermi Siulersuisut piffissaagallartillugu qinnuteqaatit suliarisinnaavaat, taamalu qinersisussat allattorsimaffiannut ilanngunneqarsinnaassallutit. Qinnuteqaatit kingusinaartumik nassiussimassagukku, qinersisussat allattorsimaffiannut ilanngunneqarsinnaassanngilatit, qinersisinnaanissaraluillu annaasinnaallugu.

Tallimanngornermiit 17. oktober 2014, allakkatigut taasinernik tunniussisoqarsinnaavoq.

Allakkatigut taasineq sapinngisamik piaartumik tunniunneqarsimasariaqarpoq, Kalaallit Nunaanni ullormi qinersiviusumi qinersiviusumut apuussinnaanissaa qularnaarniarlugu.

Taasinerit kingusinaarpat ullormi qinersiviusumi ilanngullugu kisitsinermut ilaatinneqarsinnaanngilaq.

Sukumiinerusunik paasissutissanik pissarsiniarnermi uunga innersuussisoqassaaq:

http://naalakkersuisut.gl/kl-GL/Naalakkersuisut/Naalakkersuisoqarfiit/Finanser-og-Indenrigsanliggender/Indenrigsanliggender/Valg_til_Inatsisartut