2015-imut siumoortumik nalunaarsuineq

2015-imut skattekortimik eqqortumik pissaguit, piffissanngorpoq siumoortumik nalunaarsuinermik allattuiffissamik immersuinissannut.

Akileraaruseriffiup 2013-imut aamma 2014-imut paasissutissat nalunaarsorneqarsimasut tunngavigalugit siumoortumik nalunaarsuineq ingerlatissavaa.

Paasissutissani naqinneqareersuni taakkunani eqqunngitsoqarpat imaluunniit paasissutissat amigaateqarpata siumoortumik nalunaarsuiffik paasissutissanik eqqortunik immersugaq Akileraartarnermut Aqutsisoqarfimmut nassiutissavattaaq.

2015-imut siumoortumik nammineerlutit nalunaarsuiniaruit allattuiffissatut immersugassamik ukunani aallersinnaavutit:

• Akileraaruseriffimmut
• Kommunip allaffianut imaluunniit nunaqarfinni allaffimmut
• Nittartagaq www.aka.gl
• Nittartagaq www.sullissivik.gl

Siumoortumik nalunaarsuiffik piaartumik kingusinnerpaamillu 15.november 2015 akileraaruseriffimmut nassiunneqassaaq.

Inuit 2015-imut siumoortumik nalunaarsuiffimmik tunniussisussat makkuugajupput:

• Aningaasarsiat B-t akileraarutitaqanngitsut sinnerlugit B-nik aningaasarsiaqartut, imaluunniit
• Ilanngaat aalajangersimasoq sinnerlugu annertussusilinnik ilanngaatigineqarsinnaasunik ilanngaatissaqartut
• Namminersorlutik inuussutissarsiuteqartut, akileraarutit B-nik naatsorsuiffigineqartussat imaluunniit tunisinermi allagartaliuuneqartussat

Aappariinnut katissimasunut malugeqquneqarpoq aappariinnik ataatsimut akileraarusiisarneq atorunnaarnikuummat.

Tamanna isumaqarpoq aappariit katissimasut tamarmik immikkut siumoortumik nalunaarsuiffimmik immersuissammata.

2013-imut akileraarutissat sinnerinut akiligassat siumoortumik nalunaarsuinermut ilanngunneqarneri

2013-imut inaarummik naatsorsuut malillugu akileraarutissat sinnerinut akiligassaqaleruit, Akileraartarnermut Aqutsisoqarfiup akiligassatit, tapiliussassaq 6% ilanngullugu, 18.000 koruunit sinnersimanngippagit, taava akiligassat siumoortumik nalunaarsortinninni ilanngullugit naatsorsuutigiumaarpai.

Tamanna isumaqarpoq 2013-imut akileraarutissat sinnerinut akiligassatit (annerpaamik 18.000 koruunit) tunngaviusumik akileraartarnermut ilanngaatissannit ilanngaatigineqarumaartut.

Akileraarutissat sinnerinut akiligassatit 2015-imut siumoortumik nalunaarusiorneqarninnut ilanngullugit naatsorsuutigitikkusunngikkukkit, tamanna pinngitsoortissinnaavat naatsorsuullugu ilanngunneqartup annertoqataanik Akileraartarnermut Aqutsisoqarfiup GrønlandsBanken A/S-imi kontuanut 6471-1002608 kingusinnerpaamik 20. november 2014-imi akiliuteqarnikkut.

Eqqaamajuk akiliutip sumut tunngasuunerata Nalunaarutissaa, assersuutigalugu “inuup normua xxxxx-xxxx, 2013-imut akileraarutissat sinnerinut akiligassat naatsorsuunneqartut”.

2015-imut skattekortissat December 2014-ip ingerlanerani tigunissaa naatsorsuutigisinnaavat.

Eqqortunik tunngaveqarluni siumoortumik nalunaarsuinerup ukiumi aningaasarsiorfiusumi 2015-imi eqqortunik akileraaruteqartinneqarnissat qulakkiisavaa. 

www.aka.gl -ikkut aamma www.sullissivik.gl –ikkut siumoortumik nalunaarsuineq

Siumoortumik nalunaarsuiffimmut allannguutit/paasissutissalluunniit nutaat Akileraartarnermut Aqutsisoqarfiup nammineq-toortaalluni-aaqqiissutaa www.aka.gl -imiittoq imaluunniit NemID-eqaruit www.sullissivik.gl –imi imminut sullinneq aqqutigalugit nalunaarutigineqarsinnaapput, taamatullu aamma taakku arlaat aqqutigalugit siumoortumik nalunaarsuiffik nassiunneqarsimasoq akuerisinnaallugu.

www.aka.gl –imiittoq nammineq-toortaalluni-aaqqiineq atorniarukku inuttut normut aammalu nammineq-toortaalluni-isissutissaq siumoortumik nalunaarsuiffiup saqqaani allassimasoq atorneqassapput.

2015-imut siumoortumik nalunaarsuinermi immersugassamik naqeriikkamik tigusaqarsimanngikkuit, akileraaruseriffimmut saaffiginninnikkut pissarsiarisinnaavat, immersuiffissamilu tassani nammineq-toortaalluni-aaqqiinermi isissutissaq allassimassaaq.

Paasissutissat annertunerusut www.aka.gl -imi alakkakkit imaluuniit sianerlutit 34 65 10-mut.


Siumoortumik nalunaarsuiffimmik tunniussineq

Siumoortumik nalunaarsuiffiit akileraaruseriffigisannut tunniussinnaavat.

Tamanna ima pisinnaavoq:

• Allakkerivikkut nassiussinikkut
• Faxikkut
• E-mailikkullu (immersugaq atsiugaq qarasaasiatigut assileriarlugu ilanngullugu nassiullugu)
www.aka.gl -ikkut
• www.sullissivik.gl -ikkut