Naligiissaarinermik aaqqissuussinissaq nutaaq unitsinneqarallarpoq

Qinersinissap nalunaarutigineqarnera sulissutigisassat nutaat Inatsisartunit suliarineqartussatut naatsorsuutigineqartut unitsinneqarnerannik kinguneqarpoq, taamatuttaaq 2015-imut naligiissaarisarnermut aaqqissuussinerugallartussap nutaap atuutilersinneqarnissaa eqqorneqarluni.

Naligiissaarinermut aaqqissuussinermut ilusiliussassaq ilaatigut akileraartarnermut inatsisini allanngortitsinernik marlunnik tunngavigineqarpoq, naatsorsuutigineqartutut maannakkut piviusunngortinneqarsinnaanngitsunik.

Taamaammat Aningaasaqarnermut Nunamullu Namminermut Naalakkersuisoqarfiup kommunit nalunaarfigai Naalakkersuisut inatsisit malillugit taamaallaat pisariaqartinneqarnerpaaginnarnik aalajangiisinnaammata, taamaalilluni nunarput unittoortinneqannginniassammat.

Tamatuma malitsigaa 2015-imut utaqqiisaagallartumik nutaamik naligiissaarinermut ilusiliussassap nutaat naammassineqarsinnaajunnaarnera.

Taamaammat kommunit 2015-imut ataatsimoortumik tapiissutit, naligiissaarutit, inuit akileraarutaanneersuugallartut, ingerlatseqatigiiffiit akileraarutaat pissarsianillu akileraarutit malittarisassat isumaqatigiissutillu maannakkut atuuttut malillugit tigussavaat.

Tamanna pissusiviusutigut isumaqarpoq 2015-imut naligiissaarinermut aningaasat 2014-imut naligiissaarinermutulli tunngaveqarluni naatsorsorneqassammata. Taamatuttaaq 2015-imut ataatsimoortumik tapiissutit 2014-imut ataatsimoortumik tapiissutitut aningaasartaqassapput agguaanneqarlutillu.

Taamatut pisoqarpoq 2014-imut aningaasanut inatsit akuersissutigineqareersoq aamma 2015-imut Inatsisartut aningaasaliissutinut inatsisigigallagaat aallaavigalugit.

Paatsuungasoqaqqunagu malugeqquneqassaaq qinersinerup kingorna Nalaakkersuisunngortut ataatsimoortumik tapiissutinut naligiissaarinermullu ilusiliussassaasinnaasoq nutaaq pillugu kommuninik oqaloqateqarniarsinnaanissaat ilimagineqarsinnaammat.

 


Annertunerusunik paasisaqarusuttunut attavigineqarsinnaapput naalakkersuisoqarfiup pisortarigallagaa Peter Hansen oqarasuaat 34 64 02 imaluunniit pisortaq Hans-Peder Barlach Christensen oqarasuaat 36 21 03.