Aalisartut eqqiluisaarnermik pikkorissartinneqarput

Sisimiuni aalisartut piniartullu 25-it pisaminnik tunisisartussatut marloriarlutik pikkorissartinneqarput, pikkorissarfigisaat allagartartaarfigisaallu tassaalluni inuussutissanik tunisassiortutut eqqiluisaarnermut namminerisamillu nakkutilliinermut pikkorissarneq.

Aalisartunut piniartunullu pikkorissarnermi ilinniutigineqartut Nunatsinni Uumasut nakorsaqarfiup Inuussutissalerinermullu Oqartussaaffiup INUILI suleqatigalugu suliarisimavaat.

Pikkorissaanermi anguniarneqartoq tassaavoq aalisartut piniartullu pisaminnik eqqiluitsuutitsiniartarnissaat, tamatuminngalu qaammaasaqarnerulernissaat. Pikkorissaqataasimasut pisaminnik tunisisinnaasutut pisortanit akuersissummik tunineqartarlutik.

Kalaalimerngit pisiniarfinni pisortallu suliffeqarfiini piumaneqaraluttuinnarput. Pikkorissarneq kalaaliminernik suli amerlanerusunik pilersorneqarnissamut qulakkeerinnissaaq.

Aalisartut piniartullu akuerisaasumik pisaminnik tunisisinnaasutut allagartallit aalisagartatik, imammi nunamilu miluumasut pisarisimasatik neriniartarfinnut, pisortat suliffeqarfiutaasa igaffiinut pisiniarfinnullu akuerisaasumik tunisinnaassavaat. Paarnat qeqqussallu aamma tunisinnaasaallugit.

Nunatsinni Uumasut nakorsaqarfiup Inuussutissalerinermullu Oqartussaaffiup kissatigilluinnarpaa nerisassat qularnaatsumik tunineqartarnissaat qulakkiissallugu, tamatumani pisaminnik tunisisartut akuerisaasumik aaqqissuussaasumillu allagartaqartarnissaat pingaartinneqarluni. Soorlu aamma oqariaaseq pisat kangerlummeersut nerrivimmi neriaannanngorlugit sassaalliutigineqartarneri matumani tulluartinneqartoq.

Inuussutissalerisut pikkorissaasuupput, tamannalu Nunatsinni Uumasut nakorsaqarfiup Inuussutissalerinermullu Oqartussaaffiup pikkorissaasarisa siullersaraat.

Kalaaliminernik panertitanik tunisassiortartut neriniartarfinni pisortallu suliffeqarfiutaasa igaffiini sulisut assigisaallu pikkorissarnernut arlalinnut pikkorissartinneqartarnissaat pilersaarutigineqarpoq.

Eqqiluisaarnermik pikkorissarnerit nunatsinni inuussutissat pillugit inatsit tunngavigalugu pisuupput.

Uumasut inuillu peqqissuunerat nerisassanut avatangiisinullu attuumassuteqarluinnartuuneri pikkorissartitsisarnerni tunngaviuvoq nutaatullu isumassarsiaallunilu.

Nunat tamat tamanna taasarpaat One Health. Kalaallit Nunaannilu nerisassiornermi tamanna siaruartissallugu maannakkut alloriartoqarpoq.

Nunatsinni Uumasut nakorsaqarfiup Inuussutissalerinermullu Oqartussaaffiup pikkorissaasarnini novembarip 29-anni nangissavai.

INUILI-meersut pikkorissaasalissapput, ilinniartitsisut marluk Qeqqata Kommuniata nunaqarfittaani sisamani pikkorissaassallutik.


Attavigineqarsinnaavoq uumasut nakorsaasa pisortaat Asbjørn Brandt. Uumasut Nakorsaqarfia Inuussutissalerinermullu Oqartussaqarfik. Aalisarnermut, Piniarnermut Nunalerinermullu Naalakkersuisoqarpoq. E-mail: asbr@nanoq.gl