Steen Lynge Naalakkersuisunut ilaasortatut tunuarpoq

Ullaaq manna Naalakkersuisut siulittaasuat Atassutillu siulittaasua nalunaarfigaakka Naalakkersuisunut ilaasortatut tunuarlunga.

Isiginngitsuusaarsinnaanngilarput ulluni makkunani Inatsisartut kukkunersiuinermut ataatsimiititaliaanit Inatsisartullu ilaasortaannit amerlaqisunit – taakkua sulisitsisorivavut – Naalakkersuisut siulittaasuat imaannaanngitsumik isornartorsiorneqarmat (maanna sulinngiffeqartoq) Naalakkersuisut taakkua ilaasortaaffigaakka.

Kissaatiginngilara naleqassutsit tunngavigisakka asuli sangutissallugit, maleruagassat malitassaapput aamma aningaasaqarnikkut allaffissornikkullu pissutsini isornartorsiutaasinnaasumik pisoqannginnissaanik mianerisariaqarparput.

Ingerlatseriaatsimik peqartariaqaraluarpoq naalakkersuisut taamatut pinnginnissaat anguniarlugu.

Naalakkersuisunit tunuarniutiga namineq naleqartitakka tunngavigalugit aalajangiussimavara.

Atassutip siulersuisuisa namminneq aalajangissavaat partii naalakkersuisunut ilaasortatut ingerlaannassanersoq.

Annerusumik oqaaseqarnissara kissaatiginngilara aatsaallu Tusagassiortunik katersortitsisarfimmi nal. 10 saqqummeereeruma aatsaat oqaaseqarniarpunga.

Steen Lynge & Siverth H. K. Heilmann