Sumiiffik ataasiinnaq avaleraasartoorniarfiuallaaqaaq

Aalisarnermut, Piniarnermut Nunalerinermullu Naalakkersuisumit Finn Karlsenimit isumaliutersuut

Allaanngivippoq kilisaataatillit misileraalluni avaleraasartoorniarnermi ataasiinnarmik siunertaqarlutik aalisartut, siunertaat tassaalluni iluanaaruteqarniarneq, tamannalu assorujussuaq pakatsissutigivara.

Naalakkersuisuni ilaasortatut akisussaasutullu naatsorsuutigisimagaluarpara aalisariutit aalisarfik anginerungaartoq aalisarfigisimassagaat, Aalisarnermut, Piniarnermut Nunalerinermullu Naalakkersuisoq, Finn Karlsen.

Aalisariutit nunatsinneersut 18-it Tunumi misileraalluni avaleraasartoorniarnermut aasaq manna peqataapput.

Aamma nunatsinni ingerlatsiviit aalisariutit nunanit allaneersut attartorneqarnissaannut Naalakkersuisut akuerivaat.

Aalisakkamik uagutsinnut nutaajulluinnartumik misileraalluni ukiuni kingullerni avaleraasartoorniartoqartarpoq, imartatsinni qanoq aamma siammartigisimanera misissuiffigineqarluni.

Allaffissornikkut aalisariutaatilinniillu nukippassuit misileraanermi aalisariaatsimut nutaamut misilittaaviullutik atorneqartarput, misileraaneq inuiaqatigiit aningaasaqarniarnerannut iluaqutaasussaalluni.

Pinngortitaleriffik Islandimi Pinngortitaleriffik suleqatigalugu Nunatta Isuanit avaleraasartooqassusermik misileraajutigaluni misissuititsivoq. Neriuutigisimagaluarpa aalisariutit nunatsinneersut amerlasuut misileraanerminni Tunup sineriaani, Nunatta isuanit Tasiilap sineriaata nalaanut misileraanissaat.

Maannamut takusavut naapertorlugit aalisariutit nunatsinneersut Islandip killeqarfiata eqqaani imartaminermi aalisartarput. Misileraalluni aalisarnermit paasissutissat sukumiilluartut pineqassappata, aalisariutaataatillit aalisariutitik Nunatta Isuanit Tasiilap sineriaata nalaanut aalisartittussaasimassagaluarpaat.

Avaleraasartooqassutsimut misissuinerit pingaaruteqarluinnartuupput, taakku nunatta naalagaaffittut imaanut sinerialittut avaleraasartuut pillugit isumaqatiginniutigineqartarnissaannut tunngavigineqartassammata, peqassutsimut aqutsinermullu aamma pingaaruteqarluinnassallutik. Isumaqarpunga siunissami avaleraasartoorniartarnissatsinnut siumugaaq maannakkut pilersaarusiortariaqalereerluta.

Naalagaaffiit immamut sineriallit, Island pinnani, avaleraasartoortassatik pillugit isumaqatigiissuteqareerfigereerpaat. Nunarput sinnerlugu Islandip aalisarnermut Naalakkersuisua oqaloqatigereerlugu isumaqatigiissuteqarfigaara aalisariutit nunatsinneersut pisaminnik Islandimut tulaassisinnaassasut.

Pinngortitalerifimmit ilisimatinneqarpunga Atlantikup avannaa 8,8 million tonsinik avaleraasartooqartoq, mianersortunnguamillu eqqoriarneqarpoq taakkua 15 procentii Tunup imartaaniissasut, ikinnerpaamik 5 procentit tamaaniissallutik.

Mianersortunnguamik naliliineruvoq biologit avaleraasartuunik misissuineri amerlanngimmata nunattalu imartaani avaleraasartoorniartarneq nutaajoqimmat. Pissutissaqarpoq oqassalluni avaleraasartooq tassaasoq siunissami aningaasarsiorfissatut periarfissaajumaartoq.

Tunup sineriaanit 200 sømilinut avasitsigisumut Pinngortitaleriffik aggustimi misissuititsivoq. Misissuinernit inernerugallartut takutippaat imartaq misissuiffigineqartoq tamarmi avaleraasartooqartoq. misissuiffigineqartoq Tasiilap avataaniit nunap isuanut isorartussuseqarluni. Imaq sinerissap qanittua piisalluni.

Ilisimavara aalisariutaatillit misileraalluni avaleraasartoorniarnissaminnut aningaasarpassuit atorsimagaat, aalisariutit avaleraasartoorniutissatut atorneqartussatut naleqqussarlugit.

Pakatsissutigeqaarali aalisariutit aalisarfimminniit nikippallaaratik avaleraasartoorniarmata, Tunup sineriaa atuallallugu misileraasimanatik, Finn Karlsen oqarpoq.

Ukioq manna misileraalluni aalisarnermit kisitsisaagallartut takutippaat avaleraasartuut 78.000 tonsit missaanniittut pisarineqarsimasut.

Siorna misileraalluni avaleraasartuut 53.000 tonsit Tunumi pisarineqarput.

Ukioq manna misileraalluni avaleraasartuut Atlantikup avannaani pisarineqarsinnaasut 100.000 tonsiupput.