Tamat oqartussaanerat Naalakkersuisunit pingaarneruvoq

Halvfemsikkut naalerneranni Aasianni GU-mi atuaqatigiippugut, inuttut assigiinngilagut, akuttunngitsumilli misigisarparput inuunermi pissutsit arlalissuit pillugit assigiimmik isiginneriaaseqarluta – tassunga ilanngullugu Siumumi naleqartitat inunnillu isiginneriaaseq, partiillu siorna qineqqusaarnermi kusanaqisumik saqqummersitai.

2013-imi upernaakkut qinersereernermi naalakkersuisunngortunut inuusuttunut ilaagatta marluulluta tanngassimaarutigaarput naalakkersuisullu anguniagaat ullut naalakkersuisunngortitsinerup kingorna anguniarlugit pimoorullugu suliniuteqarnikuuvugut

Ajoraluartumilli ippassaq Inatsisartuni marluulluta aamma malugaarput holditsinni allamut sangusoortoqartoq iliuutsillu illersorneqarsinnaanngitsut illersorlutigit. Marluulluta misigaarput Naalakkersuisuni siulittaasutta Inatsisartut Kukkunersiuinermut Ataatsimiitsitaliaata isumaliuutissiissutaa utaqqisariaqanngikkaa, kisianni iliuutsini pissusissamisoortutut kinguneqartittariaqaraa tunuarlunilu. Inatsisartut inatsisiliortuusut tamat oqartussaaneranni innarligassaannginerat pingaaruteqarpoq – misigivugullu tamanna ullumikkut sumiginnarneqartoq.

Isumaliutissiissummi – saqqummiunneqaruni – Nunap Karsiata pisuni arlalinni akiliutigeriaannagassatut taarsigassarsivittut atorneqarsimanera allanngortinnavianngilaa.

Iliuutsit aalajangiinerillu isumaqatigisinnaajunnaaraanni qimaguttoqartariaqarpoq. Taamaammat ullaaq manna nalunaarutigaarput Naalakkersuisuni ilaasortaajunnaarluta, marluullutali Siumumi naleqartut inunnillu isiginneriaatsit suli sorsuutigissavagut.

    

Inussiarnersumik inuulluaqqusilluta 

Nick Nielsen aamma Jens-Erik Kirkegaard

 

Asseq toqqorsivimmit.