Danmark Nunarpullu Nunarsuarmioqatigiit Ataatsimeersuarneranni

Danmark aamma Nunarput peqatigiillutik Nunap Inoqqaavi pillugit Nunarsuarmioqatigiit Ataatsimeersuarneranni peqataapput.

 

Naalakkersuisup Siulittaasuat Aleqa Hammond taavalu Danskit nunanut allanut Ministeri Martin Lidegaard ataatsimoorussamik tusagassiorfinnut nalunaarutaat.

Ulluni 22. aamma 23. september 2014 siullermeerluni Naalagaaffiit Peqatigiinni Nunap Inoqqaavi pillugit ataatsimeersuartoqassaaq. Ataatsimeersuarnissaq pineqartoq tassaavoq ataatsimeersuarneq nunanit ilaasortaasunit nuimasunit kiisalu nunap inoqqaavinik nunanit assigiinngitsorpassuarneersunit peqataaffigineqartoq. Taamatuttaaq ilaatigut Naalagaaffiit Peqatigiit Allattaanerat, Naalagaaffiit Peqatigiit Ataatsimeersuarnerannut Præsidenti, Inuit Pisinnaatitaaffii pillugit Højkommissæri kiisalu Nunap Inoqqaavisa Ataavartumik Oqaloqatigiiffarfianni siulittaasoq peqataassapput.

Danskit nunanut allanut ministeriat aamma Naalakkersuisut Siulittaasuat peqatigiillutik nuna tamakkerlugu najukkanilu nunap inoqqaavisa pisinnaatitaaffiisa atuutilersinneqarnissaat pillugu oqallinnermi ataasinngornermi ualikkut peqataassapput. Danskit nunanut allanut ministeriat Martin Lidegaard tamatumunnga atatillugu oqarpoq, peqataanissani assut nuannaarutigalugu, ingammillu Danmarkip Nunattalu akornanni illuatungeriilluni ataqqeqatigiinnermut peqatigiinnermullu uppernarsaatitut Naalakkersuisut Siulittaasuat Aleqa Hammond sanilerissagamiuk.

Naalakkersuisut Siulittaasuata Aleqa Hammondip erseqqissarpaa, Nunarsuarmioqatigiit Ataatsimeersuarnissaasa orninnerani inaarutaasumik nalunaarummik anguniagaqarfiusumik isumaqatigiissuteqartoqarsimanera, ilaatigut nunat nunap inoqqaavisa pisinnaatitaaffii pillugit Naalagaaffiit Peqatigiinnut nalunaaruteqarnissaannik kajumissaarinermik imaqartoq, kiisalu misissorniarneqartoq, Naalagaaffiit Peqatigiinni suleriaatsit pioreersut Nunap Inoqqaavisa Pisinnaatitaaffii pillugit anguniakkat anguneqarnissaat siunertaralugu sunniuteqarluarnerusumik nakkutiginninnissaq qanoq isilluni pitsaanerulersinnaanersoq.

 

Tunngavigineqartoq:

Nunarsuarmioqatigiit ataatsimeersuaqatigiinnerat siunertaqarpoq nunap inoqqaavisa pisinnaatitaaffiinik isummanik pitsaanerpaamillu timitalersuiniarluni ingerlatsinissamut atatillugu ilisimasanik avitseqatigiinnissamik, tassunga ilanngullugit Naalagaaffiit Peqatigiit Nunap Inoqqaavisa Pisinnaatitaaffii pillugit Nalunaarutaat 2007-imeersoq. Taassuma saniatigut ataatsimeersuarnerup iliuuseqarnissaq pillugu inaarutaasumik isumaqatigiissummik, nunap inoqqaavisa pisinnaatitaaffiisa atuutsinneqarnerisa nukittorsarneqarnissaat anguniarlugu, tunngavigineqartussamik akuersissuteqarnermik kinguneqarnissaa naatsorsuutigineqarpoq. Nunap Inoqqaavi pillugit Nunarsuarmioqatigiit Ataatsimeersuarnerat pillugu inaarutaasumik isumaqatigiissut Danmarkip Nunattalu peqataaffigisaannik ukiup matuma aallartilaarneranili isumaqatiginninniutigineqarsimavoq. Naalagaaffiit Peqatigiit Allattoqarfiat New Yorkimiittoq pineqartoq pillugu uani ingerlaavartumik ilanngussisarpoq: https://twitter.com/Denmark_UN.

 

Danmarkip Nunattalu inaarutaasumik isumaqatigiissut tapersersorpaat nunallu inoqqaavisa pisinnaatitaaffiisa qulakkeerneqarnissaanni sulinermi pingaaruteqartutut isigalugu. Inaarutaasumik isumaqatigiissut ilaatigut nunat tamakkerlugit nunap inoqqaavisa pisinnaatitaaffii pillugit nakkutilliinissaq taavalu Naalagaaffiit Peqatigiinni tassunga tunngasumik suliniutaat, pingaarutilinnik siunnersuutinik imaqarpoq.

 

Danmarki nunap inoqqaavi ataatsimeersuarnermi peqataanissaanut 1 million kroni sinnerlugu tapiinikuupput.

 

 

 

Naalakkersuisut Siulittaasuat                                       Danskit nunanut allanut ministeriat

Aleqa Hammond                                                           Martin Lidegaard

 

 

 

 

Paasissutissat sukumiinerusut ukununnga saaffiginninnikkut pissarsiarineqarsinnaapput:

Julie Garfieldt Kofoed, Danmarkip Naalagaaffiit Peqatigiinni New Yorkimiittumi aallartitaqarfia, julkof@um.dk, oqarasuaat: +1 212 705 4917

Rikke Skou Melsen, Danmarkip Naalagaaffiit Peqatigiinni New Yorkimiittumi aallartitaqarfia, rikkme@um.dk, oqarasuaat: +1 212 705 4931

Uiloq Mulvad Jessen, Nunanut Allanut Pisortaqarfik, Nunatsinni Namminersorlutik Oqartussat, irum@nanoq.gl, oqarasuaat + 45 51 25 15 98