KNR-ip siulersuisui toqqarneqarput

Nick Nielsen

KNR-ip siulersuisui nutaat toqqarneqarput. Siulersuisunngorput: Nukaaraq Eugenius, siulittaasutut, siulersuisunullu ilaasortatut: Mads Barlach Christensen, Mariia Simonsen, Ruth Montgomery-Andersen aamma Knud Aalua Lynge.

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisup nuannaarutigaa, maanna siulersuisut inissimmata sulilernissartillu qilanaaralugu. Tamatumunnga atatillugu Nick Nielsen oqarpoq:

”Siulersuisut katitigaanerit toqqaanermilu tunngavissat radio tv-lu pillugit inatsit nutaaq akuersissutigineqalermat oqallisaaqaat. Aalajangiusimajuarnikuuara isumaqarama pingaarnerpaasoq siulersuisut piginnaasaqarluartut qularnaarnissaat. Isumaqarpunga maanna siulersutut toqqagaasut takutikkaat, siulersuisussarsiornermut inaarutaasumik ilusiliunneqartoq atorluarsinnaasoq, aamma maanna siulersuisoqalersugut tamarmik immikkoorlutik ataatsimoorlutillu piginnaasaqarluartunik Nunattalu kulturiani oqaluttuarisaaneranilu sorlaqarfeqarluartunik. KNR-ip siulersuisortaavisa ulluinnarnilu aqutsisut suleqatigiinnerisigut ukiuni aggersuni pilersinneqarumaartut qilanaaraakka”.

Nick Nielsen-ip piffissaq iluatsillugu aammattaaq siulersuisut maanna tunuartut qutsavigivai:

”Siulersuisut maanna tunuartut ukiuni qaangiuttuni annertuumik suliaqarsimapput. Siulersuisuusimasut tulliminnut tunniuppaat KNR aningaasaqarnikkut periarfissaqalersimasoq, siunissamilu ineriartornissaminut inissaqartitsisoq. Taamaammat siulersuisut tunuartut sulinerat pillugu qutsavigiumavakka. Qularutiginngilara siulersuisut nutaat maanna periusissanut pilersaaruteqarnera, taamaalillutillu naqqaniit aallartittariaqannginnertik nuannaarutigissagaat.”

Siulersuisunut ilaasortat pillugit makku ilisimatitsissutigineqarsinnaapput:

Siulittaasoq Nukaaraq Eugenius attaveqaateqarnerup, atuakkanik naqiterisitsisarnerup saqqummersitsisarnerullu iluanni ukiorpassuarni misilittagaqarpoq, maannalu ingerlataralugu siunnersuisarfik Eugenius Consult, ilaatigut naqitanik digitalusunillu attaveqaateqarnermut tunngasunik suliaqartoq. Tamatuma saniatigut suliffinni, suliffeqarfinni, ataatsimiititaliani il.il. siulersuisunut ilaasortatut misilittagaqarpoq

Mads Barlach Christensen ukiorpassuarni Air Greenlandip sulisoqarnermut immikkoortortaani akisussaasuuvoq, aammalu pisortatut misilittagaqarluarluni aningaasaqarnermullu tunngasunik ilisimasaqarluarluni.

Mariia Simonsen Ilisimatusarfimmit inassuteqaat tunngavigalugu toqqarneqarpoq. Mariia Simonsen tusagassiuuteqarnermut tunngasunik annertuumik piginnaasaqarpoq, siulersuisunilu sulinermik annertuumik misilittagaqarluni.

Ruth Montgomery-Andersen EPI-miit inassuteqaat tunngavigalugu toqqarneqarpoq. Ruth Montgomery-Andersen eqqumiitsuliornermut kulturimullu tunngasunik annertuumik ilisimasaqarpoq pisortatullu misilittagaqarluni.

Knud Aalua Lynge KNR-ip siulersuisuinit toqqarneqarpoq, KNR-imi sulisut aalajangersimasumik atorfeqartut inassuteqarnerisigut.

Inussiarnersumik inuulluaqqusillunga
Nick Nielsen

 

Paasisaqarnerorusuttut saaffigisinnaavaat Naalakkersuisup allattaa Steen Jeppson, oqarasuaat 34 57 02.