Sinerissap qanittuani raajarniutit misileraalluni raajarniaqataasinnaapput

Fiskefartoej

Naalakkersuisut akuersissutigaat Avannaata sineriaani misileraalluni raajarniarnissamut sinerissap qanittuani aalisariutit aamma misileraaqataasinnaassasut.

Pisassaat 1.509 tonsiusut paggallugit piniarneqassapput. Misileraaffigineqartussap sumiiffia tassaavoq: 7330’ N og 7530’ N.

Aalisarnermut, Piniarnermut Nunalerinermullu Naalakkersuisoqarfik inassuteqaqqaaraluarpoq misileraalluni raajarniartussat tassaassasut avataani raajarniartartut.

Naalakkersuisoqarfilli sinerissap qanittuani raajarniartartumit misileraalluni raajarniarnissamut kissaateqartumit ukioq manna saaffigineqarpoq.

Saaffiginnissutigineqartoq tunngavigalugu Naalakkersuisoqarfik Pinngortitaleriffimmut paasiniaavoq sinerissap qanittuani raajarniutit aalisaqataappata akornutissaqannginnersoq.

Ajoriffissaqartinneqanngimmallu misileraalluni misileraaqataanissaat akuersissutigineqarpoq.

Avataasiortunut raajat 2.000 tonsit misileraassutissatut pisassiissutaareerput.

Raajartassiissutit ullumikkut ima agguarneqartarput: 57 procentii avataasiortunut sinerissallu qanittuani 43 procentii pisassiissutaasarlutik.

Agguaasseriaaserlu taanna tunngavigalugu misileraanermi raajartassiisoqarpoq. Pisassiissutaareersut 2.000 tonsit 57 procentii sumiiffimmut tamakkiisumik pisassiissutaalerneranik kinguneqarpoq.

Taamaalilluni tamakkiisumik pisassiissutaalersut 3.509 tonsiulerput, taakkunanit 43 procentit 1.509 tonsit sinerissap qanittuani aalisariutinut pisassiissutaalerlutik.

 

Attavigineqarsinnaasoq: Aalisarnermut, Piniarnermut Nunalerinermullu Naalakkersuisoqarfik, immikkoortortaqarfimmi pisortaq Emanuel Rosing. E-mail: Emanuel@nanoq.gl