Aleqa Hammondip Brookings Institutemi oqalugiarnera

 

Naalakkersuisut Siulittaasuata Washington DC-mi tikeraarnerminut atatillugu amerikamiut nunanut allanut ministereqarfianneersut Issittumi sinniisaat, Admiral Robert Papp, amerikkamiut nunanut allanut ministeriannit John Kerrymit Issittumut tunngasunik immikkut suliaqartussatut nunanillu Issittumiittunik suliaqartussaq ataatsimeeqatigai.

Brookings, USA-mi eqqarsaqatigiittartut nuimanersaannut ilaasup ullumi Nunarput aamma nukissiutit kiisalu aatsitassanik piiaaneq pillugit nalunaarusiaq saqqummersippaa. Naalakkersuisut Siulittaasuat nalunaaquttap akunnerata aappaata affaani tamanut ammasumik Nunarput pillugu oqallitsitsinermi pingaarnertut oqalugiarpoq. Brookings tassaavoq ameerikkamiut eqqarsaqatigiittartut Issittumut tunngasunik annertusiartuinnartumik soqutigisaqartoq.

USA-mut tikeraarneq naggaserlugu qaaqqusanit nunaniillu Issittumeersunit sinniisunit, amerikkamiut allaffissornikkut sulisuinit, ministeriaqarfinnit eqqarsaqatigiittartunillu peqataaffigineqartumik Nunatta Sinniisoqarfia pisortatigoortumik ammarnersiorneqarpoq.

Brookings Institutep præsidentia Strobe Talbott oqallitsitsinermik tuluit oqaasii atorlugit ingerlanneqartumik ammaareermat Naalakkersuisut Siulittaasuat Aleqa Hammond nunarput pillugu oqalugiarpoq. Oqalugiarnerup kingorna oqallitsitsinermi peqataasut; Københavnip Ilisimatusarfiani Geologimi Professori Nunattalu Ilisimatusarfiata Siulersuisuini Siulittaasoq Minik Rosing, Senior Fellow aamma Energy Security Iniative Brookings Institutep pisortaa Charles Ebinger kiisalu Doctoral Student in Government, Cornell Universitetimeersoq Kevin Foley nunarput pillugu aamma saqqummiussaqarput. Saqqummiussisut tamakkermata oqallitsitsinermut tusarnaariat Aleqa Hammondimut oqalliseqataasunullu apeqquteqarnissamut periarfissinneqarnertik atorluarpaat.

 

Tuluttut oqalugiaat atuaruk.

 

Nipaa tusaruk.

 

Assit takukkit.

 

Brookings Institutep nunarput pillugu nalunaarusiaanut link.