Sermersuup nammineq akisussaaffigaa

Tusagassiutitigut ullumikkut saqqummiunneqarpoq nalimmassaarinermik aaqqissuussaagallartoq peqqutigalugu Kommuneqarfik Sermersuup sulisuminik 75-iusunik soraarsitsisariaqalersoq.

Aningaasaqarnermut Nunamullu Namminermut Naalakkersuisoq Vittus Qujaukitsoq oqaaseqarpoq:

Maanna kommunep innuttaminut paatsiveerutitsiniarnera unitsittariaqalerpoq! Aningaasatigut torinngitsumik Kommuneqarfik Sermersuup kisimiilluni namminerlu akisussaaffigaa, ersarinnerusumik akisussaaffik qullasinnerpaami inissisimasuusoq kommunep aallaffissornikkut ingerlanneqarnera borgmester-ip akisussaaffigaa. Kommunep naatsorsueqqissaarfiata kommunep aningaasaqarnerani torinngitsuliornerpassui ersarissumik tikkuartuutigisimavaa, taamaalilluni toqqaannartumik kingunerivaa naalakkersuisoqarfimma qaammat marts-i aallartisimalereersoq tamanna immikkut eqqummaariffigilermagu.

Naatsorsueqqissaartarfiup saqqummiineratut erserpoq kommunep 2013-imi amigartoorutai 48 million koruuniusut. Taassumalu saniatigut kommunalbestyrelsep 2013-imi immikkut aningaasaliissutit 100 million koruuniusut tunniussimallugit, tassa siumoorluni naatsorsuutit sipporlugit.

Kommuneqarfik Sermersuup maanna sipaarutissarilersimasai ajoraluartumillu sulisuminik innuttaasunillu eqquingaatsiarpoq, tamannalu pissuteqarpoq Kommuneqarfik Sermersuup aningaasatigut ingerlatsinermini amigarluinnartumik nakkutiginninnginnerminut. Tamannalu aqutsinerlunnerup kingunerisimavaa aningaasaateqarnerup 300 million koruuniusut katinneqartut, ukiup nikinnerani ukioq-manna 23 million koruuninut appariarnerat. Nakkutilliisut kiisalu kommunep naatsorsueqqissaartarfiata ukiuni arlalinni tikkuartuutigisarsimavaa, pissutsilli malinneqarsimanngillat aaqqinneqaratillu.

Ajuusaarnartorujussuuvoq Kommunep maanna ajortumik inissisimalernera, minnerunngitsumik innuttaasuminut, kisianni akisussaaffik nammineq kommune-miippoq, tamannalu utaqqiisaagallartumik nalimmassaanermik aaqqissuussaagallartumit utoqqatsissutitut atorneqarsinnaanani.

 

Vittus Qujaukitsoq
Naalakkersuisoq

 

Attavissaq: Naalakkersuisup allattaa Aviâja Olsen oqarasuaat 345212.