Erngup nukinga nukissiornermut akit qaffaatissaannut annikillititsivoq

Uuliamut akit qaffannerisa kingunerisaanik innaallagissamut akit nutaat 25. september 2014-imi Naalakkersuisunit akuerineqarput.

1. august 2014-imi uuliamut akinik qaffaanerit nukissiornermut akit killilimmik qaffannerinik kinguneqarpoq, Nukissiorfiit kiassarnermut akigititaat maanna uuliamut akit qaffannerinit sunniuteqarfigineqannginnissaannik Nukissiorfiit siunnersuutaannut Naalakkersuisut akuersiniarlutik aalajangermata. Aningaasaqarneq eqqarsaatigalugu tamanna pisinnaavoq, Nukissiorfiit kissamik tunisassiorneranni taamaallat 25%-it missaat uuliamik atuiffiummat. Sinneri 75%-iusut erngup nukinga aammalu innaallagissiornermi kissap sinnera atorlugu tunisassiarineqarpoq.

Naalakkersuisoq Kim Kielsen akit qaffaataat pillugit imatut oqarpoq:

”Uuliamut akit qaffangaatsiarnerat malinnaaffigisariaqarparput, taamaalilluta ajornartorsiutit ajaannarnissaat pinngitsoortissagatsigu. Erngup nukinga annertummat, kiassarnermut akinik qaffaasussaannginnerput nuannaarutigaara”.

Uuliamut akit qaffannerisa kingunerisaanik innaallagissamut akit annerpaaffissaat kWh-mut 18 oorinik qaffapput, katillugit 3,47 kr./kWh-nngorlutik. Qaffariaat 5,5%-it missaannik annertussuseqarpoq. Akit minnerpaaffissaat kWh-mut 9 oorinik qaffapput, katillugit 1,71 kr./kWh-nngorlutik, akit minnerpaaffissaat akit annerpaaffissaannut qaffaatit 50%-iinut iluarsineqarmata. Qaffariaat 5,6%-it missaannik annertussuseqarpoq.

Qaammaqqutinut nukissiornermullu innaallagissamut akit nutaat ataasinngornermi 1. september 2014-imi atuutilissapput.

Aningaasartuutiviusut tunngavigalugit akiusut uuliamut akit qaffannerinit sunniuteqarfigineqassanngillat. Ullumikkut illoqarfinni nunaqarfinniluunniit, uulia atorlugu innaallagissiorfiusuni akiviusut tunngavigalugit akiliisoqartannginnera pissutaavoq. Qaqortumi, Narsami, Ilulissani aamma Tasiilami akiviusut tunngavigalugit akeqartitsisoqarpoq. Illoqarfinni taakkunani erngup nukinga innaallagissiornermut atorneqarpoq.

Aalisakkeriviit suli innaallagissamut imermullu aningaasartuutiviusut tunngavigalugit akit 41,5%-iinik akiliisassapput.

 

Nukissiorfiit kiassarnermut akigititaat ukiut nikinneranni akinik iluarsiinermut nalinginnaasumut atatillugu iluarsineqassapput.

 

 

 

Paasisaqarnerorusuttut attavigisinnaavaat tusagassiinermik suliaqartoq Bula Larsen, oqarasuaat 593958 imaluunniit e-mail bula@nanoq.gl.