Pingaarnersiuinerit erseqqarissut pisariaqarput

Ukiup tullissaanut aningaasanut inatsisissakkut aningaasaqarnerup patajaallisarnis-saa aqqutissiuunniarneqassaaq.

Aningaasaqarnermut Siunnersuisoqatigiit ukiumoortumik nalunaarusiartik avammut saqqummiuteqqammerpaat, tamatumuunalu pisortat aningaasaqarniarnerisigut patajaallisaasoqarnissaat namminersorlutillu ingerlatsisut akornanni ineriartortitsinissaq ujartorlugit.

Aningaasaqarnermut Nunamullu Namminermut Naalakkersuisup Vittus Qujaukitsup akisussaasutut nalunaarusiaq ilassilluarpaa, siunnersuisoqatigiillu inerniliinerisigut kaammattuutaatigullu arlalitsigut isumaqataalluni.

Tamatumunngalu atatillugu Vittus Qujaukitsoq oqaaseqarluni:

”Aningaasaqarnikkut aaqqiissutaasinnaasunik arlalitsigut Aningaasaqarnermut Siunnersuisoqatigiit ersarissunik kaammattuuteqarnerat nuannaarutigaara, tamakkunuunami aningaasaqarneq patajaallisarneqarsinnaassammat.

Ineriartortitsinissaq periarfissaqartinniarlugu aningaasaqarnikkut atuinitsinnik annikillisaassutaasinnaasutigut, tassa inuit pilersuisinnaasut ikiliartoraluartillugit pilersugassat amerliartornerisa iluanni aqqiissutissanik ujartuisoqarnera maluginiarpara.Tamatuma kingunerissavaa aaqqissuusseqqinnissap naammassinissaa, taamaalilluni amerlanerusut sulinikkut peqataatinneqarnerunissaat taamatullu aamma siusinaartumik pensionisiaqalersitsisarnikkut inatsit aqqutiginiarnissaat eqqarsaatigalugit, tassalu suliffeqarnerup soqutiginarnerulertinniarnissaa allatullu ajornaraluartumik suliunnaartariaqarnermi toqqissilluni pensioneqalertarsinnaanissaq eqqarsaatigalugit. Tamakku tungaasigut inatsisissat arlallit siunnersuusiorlugit piareersarneqarput, ukiunilu tulliuttuni Inatsisartuni isummerfigisassanngortinneqartussaallutik.”

Aalisarnerullu tungaa kisiat isiginiarnagu allatigut ineriartortitsinissaq aamma Aningaasaqarnermut Siunnersuisoqatigiit tikkuarpaat. Tamannalu Naalakkersuisut isumaqatigiinnarsinnaavaat, massakkullu aningaasanut inatsisissatut siunnersuummi ilatigut umiarsuarmik takornariaqarnerup siuarsarneqarnissaa inuusuttullu suliffissaaleqisut ikilisinneqarnissaat toqqammavissalersugaalluni.

Tamatumunngalu atatillugu Vittus Qujaukitsoq nangippoq:

”Aningaasanut inatsit pillugu partiinik oqaloqateqarnerit siulliit aallarteqqammerput. Tulleriiaarinissamullu Naalakkersuisut neriuutigivaat politikkikkut tapersersorluarneqarumaarlutik, taamaalilluni nunatta ilorraap tungaanut saqiteqqinneqarnissaa aqqutissiuunniarlugu. Nunatta inuiaqatigiinni ajornartorsiutaanik ataatsimoorluta patajaatsumik aaqqiissutissanik ujartuinissarput tamatta pisussaaffigivarput. Tamanna ajornaatsuinnaanavianngilaq. Taamaattumik aningaasanut inatsisissaq nutaaq politikkikkut akisussaaffilimmik peqataaffiginissaa pingaa-ruteqartorujussuuvoq.

Taamaattumik aningaasanut inatsisissamut atatillugu tamatumuunalu pingaarutilitsigut aaqqissuusseqqinnissamik soqutiginnittunut peqataarusuttunut assaga isaappara,” Vittus Qujaukitsoq naggasiivoq.