QUJANAQ – Eqqakkavit assigiinngissutaat ilisimakkit!

Paamiuni innuttaasut siunissami eqqakkatik assigiinngitsunut tallimanut immikkoortitertalissavaat. Suliniut avatangiisitsinnut iluaqutaasussaq.

Pingasunngornermi septembarip ulluisa 24-anni nal. 19.00 Paamiuni innuttaasut eqqagassalerinermi paasititsiniaaneq pillugu Paamiut katersortarfianni Taqqissuummi ataatsimiitinneqassapput. Maannamiit Paamiuni innuttaasut eqqakkatik assigiinngitsunut tallimanut immikkoortitertalissavaat.

Avatangiisinut Pinngortitamullu Naalakkersuisup Kim Kielsenip innuttaasunik ataatsimiititsineq aallarnissavaa.

Tamatumunnga atatillugu Kim Kielsen oqarpoq:

- Tamanna Kommuneqarfik Sermersuumit suliniutaavoq pitsaasoq, malinnaaffigissallugulu qilanaaraara, eqqakkat immikkoortiterneqartalernerini avatangiisit annertuumik pitsanngortinneqartussaammata. Assersuutigalugu savimernit immikkoortitikkat atoqqinneqarsinnaapput allanullu atortussatut atorneqarsinnaallutik. Kisiannili aamma taama pingaaruteqartigaaq immikkoortissallugit eqqagassat ikuallaanermi ulorianaatillit.

Innuttaasut ataatsimiinneranni paasititsiniaanerup imarisaa saqqummiunneqassaaq, taamatullu paasititsiniaanermut najoqqutassat Paamiuni inoqutigiinnut tamanut agguaanneqareerput.

Aamma ”Qujanaq”-p ilisarnaatai immikkut ittut, Paamiuni paasititsiniaanermut atorneqartussat suliarineqareerput, taakkulu atorlugit innuttaasut qanoq iliorlutik eqqakkaminnik immikkoortiterisassanerlutik najoqqutarissavaat:

- Igalaamernit
- Savimernit
- Eqqakkat ulorianaatillit
- Eqqakkat angisuut
- Eqqaavimmut igitassat

Kommuneqarfik Sermersooq containerinik illoqarfimmut inissiarsuillu eqqaannut ilioraassapput, taakkununngalu eqqakkat assigiinngitsut immikkoortillugit iginneqartassapput.

Paasititsiniaaneq Paamiuni eqqaavissuup salinneqarneranut ingerlasumut atasuuvoq.

Namminersorlutik Oqartussat ukioq manna eqqaavissuarnik saliinissamut katillugit 44,5 millioner koruuninik aningaasaliissuteqarput – taakkunanngalu 2,5 millioner koruunit Paamiuni eqqaavissuarmik saliinermut atorneqarnissaat naatsorsuutigineqarpoq.

Attaveqarfissamut paasissutissat:
Avatangiisinut Immikkoortortaqarfimmi Ingerlatsisoq
Mette Skarregaard Pedersen
Tlf.: (+299) 345122
Tlf.: (+299) 529844

Asseq toqqorsivimmit.