Naalakkersuisut Siulittaasuata Washingtonimi sinniiseqarfik ammarpaa

Pingasunngornermi 24. september 2014 Naalakkersuisut Siulittaasuata Aleqa Hammond Nunatta USA-mi Sinniisoqarfia Washington DC-miittoq pisortatigoortumik ammarpaa.

Aleqa Hammond oqarpoq:

”Ukiuni makkunani ineriartornitsinni suli annertunerusumik namminersorluni oqartussaanerup nunarsuarmioqataaleriartornittalu annertusiartorfianni, tulluusimaarutigalugu 1992-ip kingorna Bruxellesimi sinniisoqarfitta ammarneqarnerata kingorna sinniisoqarfimmik nutaamik ammaaqqissinnaagama tulluusimaarutigaara. Nunatta soqutigineqarnerata sammineqarneratalu annertusiartornera eqqarsaatigalugu, attavigineqarsinnaanissatta iliuuseqarfiginera ameerikkallu nunavittaata avannaaniinnissarput pingaaruteqarpoq. Naalakkersuisut pingaartippaat, ineriartornerput ilutigalugu, kimmut sanilitta toqqaannartumik attaveqarfiginerisa annertusarnissaat suleqatiginissaallu.”

Washington DC-mi tikeraarneq tassaavoq USA-mut angalanerup New Yorkimi Naalagaaffiit Peqatigiit Nunarsuarmioqatigiit nunap inoqqaavisa pisinnaatitaaffii kiisalu silap pissusaa pillugu ataatsimeersuarnermut peqataanerup naggaserneqarnera.

Naalakkersuisut Siulittaasuata Washington DC-mi tikeraarnerminut atatillugu amerikamiut nunanut allanut ministereqarfianneersut Issittumi sinniisaat, Admiral Robert Papp, ameerikkamiut nunanut allanut ministeriannit John Kerrymit Issittumut tunngasunik immikkut suliaqartussatut nunanillu Issittumiittunik suliaqartussaq ataatsimeeqatigai.

Brookings, USA-mi eqqarsaqatigiittartut nuimanersaannut ilaasup ullumi Nunarput aamma nukissiutit kiisalu aatsitassanik piiaaneq pillugit nalunaarusiaq saqqummersippaa. Naalakkersuisut Siulittaasuat nalunaaquttap akunnerata aappaata affaani tamanut ammasumik Nunarput pillugu oqallitsitsinermi pingaarnertut oqalugiarpoq. Brookings tassaavoq ameerikkamiut eqqarsaqatigiittartut Issittumut tunngasunik annertusiartuinnartumik soqutigisaqartoq.

USA-mut tikeraarneq naggaserlugu qaaqqusanit nunaniillu Issittumeersunit sinniisunit, amerikkamiut allaffissornikkut sulisuinit, ministeriaqarfinnit eqqarsaqatigiittartunillu peqataaffigineqartumik Nunatta Sinniisoqarfia pisortatigoortumik ammarnersiorneqarpoq.

 

Aleqa Hammondip oqalugiaataa.

 

Assillisat takukkit.

 

 

Attavissaq: Kalaallit Nunaata Washingtonimi Sinniiseqarfiani Pisortaq Inuuteq Holm Olsen, email: inol@nanoq.gl, mobil: +12024311660