Ataatsimoortumik iliuuseqanissaq aqqutissaavoq

Vittus Qujaukitsoq

Kommuneqarfiik Sermersuumi kommunalbestyrelsip ataatsimiinnermini ilaasortat amerlanerussuteqaqqalaarlutik KANUKOKAMUT ilaasortaajunnaarnissartik aalajangiiffigissavaat.

Aningaasaqarnermut Nunamullu Namminermut Naalakkersuisunut ilaasortaq Vittus Qujaukitsoq imatut oqaaseqarpoq:

”Ajuusarutigalugu paasivara Kommuneqarfiik Sermersooq KANUKOKAMIIT ilaasortaajunnaarluni anisussanngortoq. Ullumikkut minnerunngitsumillu siunissami ataatsimoorluta unammilligassarpassuagut ataatsimoorfigisariaqarpavut. Kialluunniit tamanna nalunngilaa, pingaartumik Aningaasaqarnermut Siunnersuisoqatigiit nalunaarutaat kingulleq atuarsimagaanni.

Aningaasaqarnermut Nunamullu Namminermut tunngasutigut akisussaasutut maluginianngitsuunngilara, kommunalbestyrelsip nammineerluni tamanna aalajangiiffigimmagu. Kommuneqarfiik Sermersuulli KANUKOKAMIT aninissaa sorpassuartigut kinguneqarsinnaavoq. Kommunit Naalakkersuisunut isumaqatigiinniartarnerini suleqateqarnerinilu KANUKOKA qitiusutut inissisimavoq, taamatullu aamma KANUKOKA Namminersorlutik Oqartussat inatsisiliornerini oqaloqataalluartuusarluni, matumani aamma kommunini aningaasarsianut tunngasut ilanngullugit.”

"Pisortat iluini eqaallisaanertigut ataatsimoortumik suleqatigiinnerni aamma KANUKOKA pingaaruteqartuuvoq, aammalumi aaqqissuusseqqinnermik inerniliiaartuaaneq eqqarsaatigalugu.

Taamaattumik kaammattuutigerusuppara, aninissap malitsigisinnaasai pillugit kommuni eqqarsarluassasoq, tamatumunngalu atatillugu kommunalbestyrelsi siunissami qanoq ingerlariaqqinnissani isummersuuteqarfigalugu," Vittus Qujaukitsoq naggasiivoq.