Aalisartut inuusuttut immikkut akuerineqarput

Stemningsbillede

Aalisarnermut, Piniarnermut Nunalerinermullu Naalakkersuisup, Finn Karlsenip, inuusuttut 18-init 29-nut ukiullit sinerissap qanittuani aalisartunngorusullutik qinnuteqartut immikkut akuerisinnaaqqullugit aasaq manna akuerissutigivaa.

Aalisarnermut nalunaarut allanngortinneqarmat inuusuttut 20-it missaanniittut aalisarsinnaanermut akuersissummik tunineqarput.

Aalisarnermut, Piniarnermut Nunalerinermullu Naalakkersuisoqarfik qinnuteqaatinik arlalinnik tigusaqarpoq.

Qinnuteqarnermi uppernarsaqqusat arlaliupput, taakku nalunaarummi piumasaqaataallutik, tassaallutik:

  • aalisartussatut ilinniarsimasuunissaq, imaluunniit
  • Aalisarnermut Piniarnermullu Ilinniarfimmi ilinniarsimasuunissaq, imaluunniit
  • aalisartussatut piginnaasaqalersimasuunissaq (ataataminik aalisaqartarsimasuusinnaavoq allaluunniit ilagalugu)

Qinnuteqarnermi piumasaqaataavoq qinnuteqartup inuussutissarsiutigisinnaasaminik umiatsiaaraqarnissaa aalisaateqarnissaalu.

Avannaani qaleralinniarnerup ingerlanneqarnera matumani eqqumaffiginiarneqartorujussuuvoq.

Aqutsiveqarfinni Upernavimmi, Uummannami Qeqertarsuullu Tunuani aalisariutit meterinik arfinilinnik anginerit 137-it akuersissuteqarput. Sumiiffinni pineqartuni umiatsiaararsortut amerlasuut akuersissuteqarlutik.

Qaleralinniarsinnaanermut akuersissutillit katillutik 794-upput. Nalinginnaasumik akuersissutit piumasaqaataannik akuersissuteqartut 200-it missaanniittut 18-nit 29-nut ukioqartuupput.

Qaleralinniutit meterinik arfinilinnik anginerit 107-it umiatsiaaqqallu 416-init qaleralinniarnissaminnut akuersissuteqarput, taakku nunatta ilaaneersuullutik, aqutsiveqarfiit Upernavik, Uummannaq aamma Qeqertarsuup Tunuani aalisartuunatik.

 

Attavigineqarsinnaasoq: Aalisarnermut, Piniarnermut Nunaqarfinnullu Naalakkersuisoqarfik, immikkoortortaqarfimmi pisortaq Emanuel Rosing. E-mail: Emanuel@nanoq.gl