Naalakkersuisut takornariaqarnermut aningaasaliinerusut

Naalakkersuisut 2015-imi takornarianik amerlanerusunik Kalaallit Nunaannukarumalersitsiniarnermik suliniuteqarneq million koruuninik arlalinnik annertusissavaat.

Ippassaq ulloq 18. september radioaviisimi oqaatigineqarpoq Naalakkersuisut 2015-imut aningaasanut inatsimmut siunnersuummut atatillugu takornariartitsisarnermut ataatsimut katillugit aningaasaliissutit annikillisimagaat.

Paasissutissiineq eqqunngilaq. Paarlattuanik Naalakkersuisut ukiaanerata ingerlanerani takornariartitsisarnermut inuussutissarsiornermut iluaqutaasumik 10 millioner koruunit missaannut naapertuuttumik suliniuteqarnerup annertusinissaa pilersaarutigaat. Tamanna ilaatigut umiarsuarmik takornariartitsinermut akitsuutit 8,4 mio. koruuninik annikillisinneqarnissaannik siunnersuuteqarnikkut pissaaq. Tamatuma saniatigut takornarianik timmisartuussinermut (nunanut allanut aalajangersimasumik angallaviunngitsunut) iluaqutaasumik timmisartumik angallassinermut suliassaqarfimmi akitsuutinik allanik 1,3 mio. koruuninik oqilisaanissaq siunertaavoq.

Aningaasartuuteqarfiusussanut siunnersuutinut taakkununnga siunertaavoq umiarsuarmik takornariartitsisartumik ilaasut, Kalaallit Nunaannukartartut amerlassusaasa ukiuni arlalinni ikiliartorsimasut mumisinneqarnissaat, peqatigisaanillu takornariartitsisarnermik inuussutissarsiortunut atugassarititaasunut sinaakkutissat pitsaanerulersinneqarnissaat.

2010-imiilli umiarsuarmik takornariartitsisartumik takornariat Kalaallit Nunaannukartartut annertoorujussuarmik ikilisimapput. Umiarsuarmik takornariartitsisartumik ornigassanut allanut, soorlu Islandimut aamma Svalbardimut, piffissami tassani umiarsuarmik takornariartitsisartumik ilaasut amerliartorsimapput.

Inuussutissarsiornermut, Aatsitassaqarnermut Suliffeqarnermullu Naalakkersuisoqarfik Kalaallit Nunaanni umiarsuarmik takornariartitsisartumik takornariartarnermi misissueqqissaarnermik suliaqarpoq, tassani takutinneqarluni pingaartumik umiarsuarnut takornariartitsisartunut Kalaallit Nunaannut ikittoriaannarlutik tikittartunut tunngatillugu, umiarsuarmik takornariartitsisartumik ornigassanut soorlu 

Islandimut aamma Svalbardimut unammillertaasunut akitsuummut sanilliullugu, umiarsuarmut takornariartitsisartumut ilaasunut akitsuut qaffasissoq.

Islandimi aamma Svalbardimi umiarsualivimmut akitsuutit atorneqarput, tassani umiarsuit angissusaat aallaavigineqartarluni. Misissueqqissaarnerup takutippaa tikinnermi umiarsuarmut takornariartitsisartumut angisuumut 2.500-inik ilaasoqartartumut umiarsualivimmut akitsuut Islandimi 70.000 koruunit missaanniissasoq. Umiarsuaq takornariartitsisartut taanna Kalaallit Nunaannut ataasiaannarluni tikippat, Kalaallit Nunaanni akitsuut 1,3 millioner koruunit missaanniissaaq.

Siunnersuummi umiarsuarmik takornariartitsisarnermut suliassaqarfimmi akitsuutip unammillersinnaassuseqartumik annertussuseqalersillugu appartinneqarnissaa siunertaavoq, taamaaliornikkut ukiuni aggersuni umiarsuarmik takornariartartut amerlanerusut Kalaallit Nunaannukarumalersinniarneqarsinnaassallutik.

Tassunga atatillugu umiarsuit angisuut, ullumikkut Kalaallit Nunaannut tikinnatik avaqqutiinnarlutik angalanissamik toqqaasartut amerliartuinnartut pilerilersinniarnissaat pingaartumik pingaaruteqarpoq.

Akitsuutinik annikillisitsinerup aningaasalersuutissat Visit Greenlandimut kiffartuunneqarnissamut isumaqatigiissutip, aamma 2015-imi 13,911 millioner koruuninik aningaasartaqartussap, ilanngaavigineqarneratigut nassaarineqanngillat. 1,6 mio. koruunit siusinnerusukkut tusagassiuutitigut oqaatigineqartut, aningaasanut siusinnerusukkut kusanartulianik aamma misigisassarsiortitsinermik inuussutissarsiornermik nittarsaassinermik immikkut suliniuteqarnermut immikkoortinneqarsimasunut tunngassuteqarput. Aningaasat taakkua siunissami angallannermut suliassaqarfimmi akitsuutinik appartitsinikkut, takornariartitsisarnermik inuussutissarsiornermut atugassarititaasunut sinaakkutissat nukittorsarneqarnissaannut atugassiissutigineqassapput.

 

Inuussutissarsiornermut Aatsitassanullu Naalakkersuisoq Jens-Erik Kirkegaard annertunerusumik oqaaseqartinniaraanni attavigineqassaaq Naalakkersuisup allattaa Kirsten Enequist  oqarasuaammut +299 34 56 04.