Nuuk TV-mi paasissutissat kukkusut

GeoSurvey Greenlandip pilersinneqarneratigut kingunissai pillugit Nuuk TV-mi paasissutissat kukkusut

GeoSurvey Greenlandip (GSG) pilersinneqarneratigut kingunissai pillugit Nuuk TV ataasinngornermi 15. september aamma marlunngornermi 16. september nutaarsiassanik aallakaatitsivoq. Siunnersuut ukiaanerani ataatsimiinnermi sammineqassaaq. Nutaarsiassani ilaatigut saqqummiunneqarpoq ujarassiornikkkut ilisimatusarnerit De Nationale Geologiske Undersøgelser for Danmark og Grønland-imit (GEUS) suliarineqartartut 105 mio. kr.-nik nalillit peerneqarnissaannik kinguneqassasoq.

Tamatuma eqqunnginnera erseqqissaatigineqassaaq. GSG pilersinneqarpat pilersinneqanngikkaluarpalluunniit GEUS’ip Kalaallit Nunaanni misissuisarnerni suliaannut aningaasatigut tapiissutit allanngortinneqartussaanngillat.

Aammattaaq GSG-p pilersinneqarnissaanut atatillugu inatsisissatut siunnersuutip tusarniaassutigineqarnerani GEUS-ip akissutaani erseqqippoq, GEUS-ip aningaasanut inatsisitigut aningaasalersugaanerani Kalaallit Nunaanni misissuinerni ingerlattagai allanngortinneqassanngitsut.

Taamaammat GSG pilersinneqassappat misissuinerni ingerlatat annaaneqarneri ukiumut 100 mio. kr.-t sinnerlugit Nuuk TV-p akeqartussaaneragaalluni paasissutissiissutissiissutigisai sakkortunerpaamik akerlilerneqartariaqarput. Inatsisissatut siunnersuummut oqaaseqaatit Nuuk TV-imit atuarneqarlutik paasineqarsimasinnaangaluarput. Inatsisissatut siunnersuummut oqaaseqaatit imaqarniliornerat tusagassiuutitigut nalunaarummi matumani issuarneqassapput, qupperneq 16-imi ima allaqqasoqarpoq:

Tusarniaanermi GEUS-ip akissutai aamma innersuussutigineqassapput:

 

”Aatsitassanut inatsimmi § 49-mut naleqqiullugu akuersissuteqartarnermut piumasaqaammut GEUS Aatsitassanut inatsimmi § 2, imm. 4-mi, namminersornermut inatsimmi § 9 naapertorlugu isumaqatigiissuteqartoqartartillugu ilaatinneqanngilaq, taamaalilluni Naalakkersuisut atugassaaannik Kalaallit Nunaanni aatsitassanik misissuinermut immikkut ittumik pingaarutilinnik ilisimatusarnermik atugassiisarneq pillugu Namminersornermut inatsimmi nassuiarneqartutut pisussaaffimmik GEUS naapertuutsitsisinnaalluni. Pineqartut tassaapput ukiumoortumik (2013) aningaasanut inatsimmit aningaasaliissutit 35,3 mio. kr. GSG pillugu inatsit pissutsimik taassuminnga allannguuteqartitsinngilaq, taamaattumillu Aatsitassanut inatsimmi allassimasutut ingerlatseriaatsit mannalu tikillugu periusiusartut GEUS-ip malittariuassavai”.

Taamaammat danskit 2015-imut aningaasanut inatsisissatut siunnersuutaani aamma takuneqarsinnaavoq GEUS-ip Kalaallit Nunaannut attuumassuteqarnermigut ingerlatat aningaasaleeqataaffigalugit aatsitassanut tunngasutigut ingerlataminut 5,5 mio. kr.-it kiisalu sullissinernut ilisimatusarnikkullu suliassanut nalinginnaasunut 30,2 mio. kr.-t atortuassallugit suli pisussaatinneqassasoq.

Tamakku saniatigut ilisimatusarnikkut aningaasaliiffigeqataaffigisaasut GEUS’ip ingerlattarpai, makku aningaasaleeqataallutik; Namminersorlutik Oqartussat, EU, aningaasaateqarfiit, ilisimatusarnikkut siunnersuisooqatigiit, suliffeqarfiit selskabit il.il.

Kalaallit 2015-imut Aningaasanut inatsisissatut Siunnersuutaani oqartussatut suliarinninnernut atatillugu GEUS-imi siunnersuisunik ikiorneqartarnerni pisisarnissat aningaasaliissutini allanngortinneqanngillat, taamattaarlu ujarassiornikkut niuerfissanut pilerisaarisarnerni pilersaarutinut aningaasaliissutit aamma allanngortinneqarnatik.

Tamakku tamaasa eqqarsaatigigaanni GEUS’ip Kalaallit Nunaanni manna tikillugu ilisimatusarnikkut suliniutigisartagai atorunnaarneqassasut pillugit nutaarsiassatut taaneqartoq kukkulluinnartuusutut assortorneqassaaq.

GSG’ip pilersinneqarneranut siunertaq tassaavoq – ukiualuit ingerlanerini – ujarassiornikkut sammisaqarnerup iluani nunatsinni piginnaasanik inerisaanissap qulakkeerneqarnissaa, avatangiisinik sammisaqarnermi Pinngortitaleriffiup aamma DCE’p akornanni suleqatigiinnermi pisartut assinginik.

GEUS’imik suleqatigiinnissamut isumaqatigiissutip nutaap ukiunut 5-inut atuuttussap ukioq manna aggustusip qaammataani isumaqatigiissutigineqartup qulakkeertussaavaa, ujarassiornikkut misissuisarnerni siunnersuisarnernilu GEUS suli pingaaruteqartutut atuunnissaa, tamatumunngalu ilutigitillugu ujarassiornikkut piginnaasatta inerisarneqarnissaannut ikiuuttussaalluni.

 

Inuussutissarsiornermut Aatsitassanullu Naalakkersuisumit erseqinnerusunik oqaaseqaateqartitserusuttut attavigisinnaavaat Naalakkersuisup allattaa Kirsten Enequist oqarasuaammut +299 34 56 04.