Meeqqat atuarfiata nalilersorneqarnera pillugu

Meeqqat atuarfiata nalilersorneqarnera pillugu ataatsimoorussamik tusagassiorfinnut nalunaarut - IMAK, KANUKOKA aamma Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfik.

Meeqqat atuarfiannik nalilersuineq pisarialik ingerlanneqaleruttorpoq

Ulluni makkunanerpiaq EVA – Danmarkip nalilersuinermut instituttia Ilinniartitaanermut Naalakkersuisoqarfik, KANUKOKA IMAK-ilu qanimut attavigalugit suleqatigalugillu meeqqat atuarfiannik sumulluunniit attaveqanngitsumik nakerisassarsiunngitsumik nalilersuinermik ingerlatsileruttorpoq.

Nalilersuineq apeqqutit akisassat atorlugit nalunaarsuinertut misissuinertaqarlunilu atuarfimmi atuarfiullu avataani soqutigisaqartunik ilisimatuussutsikkut apersuinernik immikkoortortaqarpoq.

EVA-mi sulisut illoqarfinnut nunaqarfinnullu toqqakkanut angalanertik qiterpaarpaat nalunaarutigaallu misissuinerup apersuinertaa pilersaarutit malillugit ingerlasoq tikitaminnilu tamani ilassilluarneqartarlutik.

Nalilersuineq meeqqat atuarfiani pissutsinik tamatsinnut ilisimasaqarnerulersitsiniartussaq Naalakkersuisoqarfimmiit, KANUKOKA-miit IMAK-imiillu isumalluarfigineqartorujussuuvoq.

Meeqqat atuarfiat ineriartorteqqissagutsigu pisariaqarluinnarpoq meeqqat atuarfiini meeqqatta ineriartornerinik ilikkariartornerinillu suliaqartut tamarmik nalilersuinermut peqataanissaat, taamaalilluta tamakkiinerusumik eqqornerusumillu ullutsinni meeqqat atuarfianni pissutsit pillugit paasissutissanik peqalerniassagatta.

Taamaattumik Ilinniartitaanermut Naalakkersuisoqarfimmiit, KANUKOKA-miit IMAK-imiillu inussiarnersumik meeqqat atuarfiini ilinniartitsisut pisortallu kaammattorneqarput apeqqutit akisassat immersoqqullugit taamaalillutillu ilisimasaminnik misilittakkaminnillu avitseqataanermikkut meeqqat atuarfiata ineriartoqqinnissaa iluaquserlugu.


Aqutsisoqatigiit sinnerlugit.

Inussiarnersumik inuulluaqqusilluta

Mikael Kristensen

 

Assii: Angu Motzfeldt