Eqqaavissuit amerlanerusut salinneqassapput

Kim kalender 4

32 mio. koruunit eqqaavissuarnik saliinissamut atugassat nuunneqarnissaat Inatsisartut Aningaasaqarnermut Akileraartarnermullu Ataatsimiititaliaata ulloq 25. August 2014 akueraat.

Naalakkersuisut inassuteqaataat tunngavigalugu suliffissaqartitsiniarnermik siuarsaanissamut, sanaartornermi iluarsaassinermilu suliassat immikkut ittut aallartinneqarnissannut aningaasaliissutit 174,2 mio. koruuninik ilaneqarnissat Inatsisartut Aningaasaqarnermut Akileraartarnermullu Ataatsimiititaliaata 2014-imi apriilimi akueraat.¨

Aningaasanit taakkunannga 44,5 mio. koruunit avatangiisinut suliassaqarfimmi suliniutinut immikkoortinneqarput – 12,5 mio. koruunit eqqaavissuarnik saliinissamut aamma 32. mio. koruunit anartarfilerinermi atortunut nutaanut.

- Immikkut ittumik aningaasaliinermi aningaasaqarnermut piffissamullu sinaakkusiussat iluanni anartarfilerinermut suliniutit aallaqqaammut pilersaarutigineqartut naammassisinnaanatigit kommunit peqatigalugit naliliivugut. Taamaattumik tamatumunnga taarsiullugu annertuumik eqqaavissuarnik saliinermik ingerlatsinissamut, anartarfilerinermut atortunut aningaasaliissutit allanngortinneqarnissaannik Naalakkersuisut Inatsisartut Aningaasaqarnermut Akileraartarnermullu Ataatsimiititaliaannut qinnuteqarput. Taamaattumik Inatsisartut Aningaasaqarnermut Akileraartarnermullu Ataatsimiititaliaat naliliinitsinnut tapersiisimammat, aammalu aningaasat tamatumunnga taarsiullugu nunatsinni eqqaavissuit amerlasuut salinneqarnerannut atorneqarnissaannik akuersimmat nuannaarutigeqaara, Avatangiisinut Pinngortitamullu Naalakkersuisoq Kim Kielsen oqarpoq.

Ullumikkut eqqaavissuit amerlanersaat avatangiisinut akuersissuteqarfigineqanngitsumik ingerlanneqarput. Sumiiffippassuarni avatangiisinut mingutsitsisarput inuillu peqqissusaannut sunniuteqarsinnaallutik.

Maannakkut katillugit 44,5 mio. koruunit ukunani eqqaavissuarnut atorneqartussat sinaakkusiunneqarput: Upernavik, Kangerlussuaq, Maniitsoq, Paamiut, Narsaq, Qaqortoq, Tasiilaq, Ittoqqortoormiit, Sisimiut, Nanortalik, Alluitsup Paa, Narsarsuaq, Aappilattoq, Qassiarsuk, Narsaq Kujalleq, Ilulissat, Aasiaat, Qasigiannguit aamma Qeqertarsuaq.

- Maannalu kommunit – taamatut aningaasaqarnikkut annertuumik ikiorserneqarlutik – eqqagassalerinerminni avatangiisinik malunnaatilimmik pisariaqartinneqartumillu pitsannguisinnaanissaat qilanaaraara, Avatangiisinut Pinngortitamullu Naalakkersuisoq Kim Kielsen oqarpoq.

- Suliffissaqartitsiniarneq annertusitinniarlugu suliniutit aamma avatangiisinik malunnaatilimmik pisariaqartinneqartumillu pitsannguinernik pilersitsiviunissaat uannut pingaaruteqartuaannarsimavoq, Kim Kielsen naggasiivoq.

Anartarfilerinermut tunngatillugu maannakkut kommunit suleqatigalugit periusissanik nutaanik aammalu aaqqiissutissanik allanik eqqarsartoqassaaq, taamaalilluta aamma suliassaqarfimmi tassani avatangiisinik pisariaqartinneqartunik pitsannguisinnaassagut.



Attaveqarfissaq:

Avatangiisinut immikkoortortaqarfimmi pisortaq
Mette Skarregaard Pedersen
Tlf.: (+299) 345122
Tlf.: (+299) 529844