Aleqa Hammond ”Den Sorte Diamant”-imi naapiguk

Aleqa Hammond Den Sorte Diamantimi ulloq 18. september naapiguk.

Naalakkersuisut Siulittaasuat Aleqa Hammond sisamanngornermi ulloq 18. september 2014 tusagassiortumit Martin Breumimit Dronningesalemi Det Kongelige Bibliotekimiittumi nal. 15.00-imiit 17.00-imut apersorneqassaaq.

Apersuineq Det Kongelige Bibliotekip Det Udenrigspolitiske Selskabillu suleqatigiinnerisigut aaqqissuunneqarsimavoq.

Qaaqqusissummi Det Udenrigspolitiske Selskab ilaatigut imatut allappoq:

”Aleqa Hammond tassaavoq Kalaallit Nunaanni Danmarkimilu ullutsinni politikerit pissanganarnersaralugulu maluginiarneqarnersaasa ilaat. Aleqa Hammondip, 2013-imiilli Kalaallit Nunaanni Naalakkersuisunut Siulittaasuusup Kalaallit Nunaata Naalagaaffeqatigiinniit avissaarnissaa ammasumik oqaluuserisarpaa. Tassanilu aatsitassat Danmarkimit avissaarnissamut aningaasaliissutissatut eqqartortarlugit. Aleqa Hammond tassaavoq Danmarkip Kalaallit Nunaatalu akornanni attaveqatigiinnermi nutaami tamanit saqqumilaarnerpaaq.”

Det Kongelige Bibliotek allappoq:

”Kalaallit Nunaanni Naalakkersuisut Siulittaasuat Aleqa Hammond eqqartortillugu isummat maluginiagassaapput. Politikeritut Aleqa Hammond qamani nukimmik peqarpoq, imminut nunaminullu tunngatillugu Danmarkimit avissaarnissaq takorluugaraa. Nunasiaataasimanerulli qaangerniarneraniipput Kalaallit Nunaanni inuuniarnikkut ajornartorsiutit, ilinniarsimassutsip appasinnera nunallu Aleqa Hammondip nunap avissaarfiginiagaanit ukiumoortumik tapiissutit 3,6 milliardiusut annertuumik pinngitsoorsinnaannginnerat[…]

Sakkortuumik oqallinnissaq […] naatsorsuutigineqarpoq, politikerip sakkortuumik qinngornillip tusagassiortup TVkkullu aallakaatitassiortup Martin Breumip oqaloqatiginerani qulequttat soorlu Kalaallit Nunaata aningaasaqarnikkut namminiilivinnissaanut tunngassuteqartut kiisalu Danmarki Kalaallit Nunaanni aatsitassarsiornerup ingerlanneqarneranut akuliussinnaanersoq, peqatigiinnernup ingerlatiinnarneqarnissaanut periarfissat qanoq isikkoqarnersut, minnerunngitsumillu – Aleqa Hammondip Danmarkimit nunasiaataasimaneq pillugu pisortatigoortumik utoqqatserfigineqarnissaq piumasaraa?”

Naalakkersuisut Siulittaasuat piffissami 17.-19. september aaqqissuussinermut qulaani taaneqartumut atatillugu ataatsimiinnissallu pissutigalugit Københavnimiissaaq.

Naalakkersuisut Siulittaasuat ulloq 20. september New Yorkiliarluni aallassaaq, tassani ulloq 22. september Naalagaaffiit Peqatigiit Nunap Inoqqaavi pillugit ”nuna tamakkerlugu najukkanilu nunap inoqqaavisa pisinnaatitaaffiisa atuutilersinneqarnerat” pillugu Nunarsuarmioqatigiit ataatsimeersuarneranni saqqummiussissaaq kiisalu 23. september Naalagaaffiit Peqatigiit Allattaanerannit qaaqquneqarluni Silap pissusaa pillugu ataatsimeersuarnermi ilisimatuussuseq silallu pissusaata allanngornera pillugit saqqummiussissalluni.

Ulloq 24. september Naalakkersuisut Siulittaasuata Nunatta Washington D.C.-mi Sinniisoqarfittaarput nutaaq pisortatigoortumik ammassavaa.

Den Sorte Diamantimi aaqqissuussineq Dronningesalimi pissaaq, taannalu aaqqissuussineruvoq matoqqasoq, Danmarkimi Udenrigspolitiske Selskabimi ilaasortanut ilinniartunullu Det Kongelige Bibliotekip ”Students Only!”-mi peqataasunut qaaqqusanullu immikkut ittunut naatsorsuussaallunii.

Paasissutissat sukumiinerusut uunga saaffiginninnikkut pissarsiarineqarsinnaapput:

Naalakkersuit Siulittaasuannut allattaagallartoq Elisabeth Ravn Johansen
Naalakkersuisut Siulittaasuata Naalakkersuisoqarfia
Email: eliv@nanoq.gl 
+299 48 64 08 / +45 51 50 14 44

Det Kongelige Bibliotek
Email: kb@kb.dk 
+45 33 47 47 47 
http://www.kb.dk/da/dia/studentsonly/eksklusivt/140918_aleqa_hammond

Det Udenrigspolitiske Selskab
Email: udenrigs@udenrigs.dk 
Tel: +45 33 14 88 86
http://udenrigs.dk/kommende-arrangementer/