IWC-p arfattassiissutit akuersissutigai

Arfanniarnermut Ataatsimiititaliarsuup september 2014-imi 65-issaannik ataatsimiinnera – arfattassiissutit akuersissutigai.

IWC-mi amerlanerussuteqarluartoqarluni (tapersersuisut 46, akerliusut 11-k aamma taaseqataanngitsut 3-t) ukiunut tulliuttunut sisamanut (2015-imiit 2018-imut) arfattassiissutissanut Kalaallit Nunaata siunnersuutaa akuersissutigineqarpoq.

Kitaanut:

• Tikaagulliit 164-it

• Tikaagulliusaat 19-it

• Qipoqqaat qulit

• Arfiviit marluk

Tunumut:

• Tikaagulliit aqqaneq marluk

Pisassiissutinit sinneruttunik ukiumiit ukiumut nuussisarnermut maannamut malittarisassat ingerlaqqiinnarput.

Pisassiissutit siuliini taaneqartut tamarmik ilisimatuussutsikkut ataatsimiititaliap kaammattuutaanik tunngaveqarput. Piumasaqaat kalaallit piumasaqaataasa akornanni qitiulluinnarsimasoq. Pisassiissutissat tullissaanik isumaqatigiinniutigeqqinneqassapput 2018-imi.

Aalisarnermut Piniarnermut Nunalerinermullu Naalakkersuisoq Finn Karlsen oqaaseqarpoq:

”Naammagisimaarluinnarpara isumatusaarluni eqqarsartarneq kiisami IWC-mi ajugaasimammat taamaaliornikkullu qulakkeerneqarluni ukiuni tulliuttuni sisamani Kalaallit Nunaata imartaani arfernik aqutsineq iluaquteqarnerlu naapertuuttumik ilisimatuussutsikkullu tunngavilimmik ingerlaannassammat. Angusap aamma takutippaa nunanik allanik suleqateqarluni anguniagaqarneq aqqutissaasoq. Nunat EU-mi ilaasortat IWC-mut ilaasortat suleqatigisimaneri qujamasuutigaara.”

Tamanna pillugu Naalakkersuisut Siulittaasuata Aleqa Hammondip oqaaseqaataa uani atuarneqarsinnaavoq.



Paasissutissiissutit erseqqinnerusut pissarsiarineqarsinnaapput uunga saaffiginnilluni: Immikkoortortaqarfiup pisortaa Amalie Jessen, amalie@nanoq.gl – oqarasuaat + 299 34 53 04