Tarnimikkut nappaatillit pillugit itisiliineq

SKH kalender 2

Ineqarnermut Naalakkersuisup Siverth K. Heilmannip tallimanngornermi 12. september 2014 tarnimikkut nappaatillit Namminersornerullutik Oqartussat inissianik attartortitaaniittut pillugit itisiliilluni nalunaarutaa

Tusagassiuutitigut nalunaarutinnut ullumimeersumut innersuussillunga aammalu innersuussussutigalugu Ineqarnermut Naalakkersuisoqarfiup Kommunimut allagaa Kommuneqarfik Sermersuumit avammut saqqummiutissallugu toqqarneqarsimasoq, ilisimatitsissutigisinnaavara Namminersorlutik Oqartussat inissiaataanni Nuummiittuni najuqartut arlallit saaffiginnillutik najugaqarfimminni affarlerisatik/qulaamiorisatik eqqaamiutilluunniit tarnimikkut nappaatillit maalaarutigisarsimammatigit. Inissianik attartortut toqqissisimanngissuteqarput aammalu taakku meerartaat eqqaamiuminnit tarnimikkut nappaatilinnit pisuni amerlasuuni annilaangatinneqarlutillu ersiortinneqartarsimapput.

Tarnimikkut nappaatillit ilaasa piffissaagallartillugu Kommuneqarfik Sermersuup tungaanit ikiorneqartarsimannginnerat pakatsissutigaara. Ikiorneqarnissamik pisariaqartitsigaluartut ikiorneqartannginnerisa kingunerisaanik A/S INI-ip tarnimikkut nappaatilinnik anisitsisariaqartarneranik kinguneqartarpoq.

Tarnimikkut nappaatillit mianersoqqussummik tunineqareerlutik inigisaminnit anisitaasariaqartarnerannut taarsiullugu Kommunip isumagisariaqaraluarpaa najugaqarfissaanik naleqquttunik tunissallugit, taamaaliornikkut avatangiisiminnut akornusersuinissaat ingalassimatinneqarsinnaaqqullugu aammalu pisariaqartitartik malillugu ikiorneqarlutillu tapersersorneqarsinnaaniassammata.

Eqqortumik oqaatigineqassappat Kommuni pisussaaffeqarpoq tarnimikkut nappaatilinnik ikiorsiissalluni tapersersuissallunilu. Tamanna naqissuserneqarpoq innarluuteqartut pillugit Inatsisartut peqqussutaanni aammalu FN-ip innarluutillit pillugit isumaqatigiissutaani. Inissiaatileqatigiiffik A/S INI inissianik aqutsisutut tarnimikkut napparsimasunut sullissisinnaasunik atorfilittaqanngilaq aamma suliassaqarfimmut pineqartumut ilinniarsimassutsikkut nukinnik pigisaqarani. Taamaammat INI Kommunimut saaffiginnittarpoq pisuni taamaattuni ikiorneqarnissamik noqqaassuteqarluni – taamaattoqartaraluartorli Kommuni naammattumik iliuuseqarneq ajorpoq.

Ilimagisariaqarpara Kommune nammineerluni inissiaatileqatigiiffiata Iserit A/S-ip tarnimikkut napparsimasut Kommunip inissiaataani najugaqartut qanoq sullinneqassanersut ilisimasaqarfigalugulu misilittagaqarfigisimassagai. Taamaammat assut kissaatiginartippara Kommunip, Namminersorlutik Oqartussat, INI aammalu Iserit suleqatigalugit suliassat taamaattut siunissami qanoq isumannaannerpaamik periaaseqarfigineqassanersut pillugit ataatsimoorussamik qimerluussagai, taamaaliornikkut tarnimikkut napparsimasut eqqaamiuilu sumiginnagaasutut aammalu eqqakattarineqartutut misigisimatinnginnissaat qulakkeerneqarsinnaaqqullugu.

Naggataatigut erseqqissaatigilara, Namminersorlutik Oqartussat tungaannit pisariaqarluinnartutut pingaaruteqarluinnartutullu isigigatsigu tarnimikkut napparsimasut naleqquttunik inissaqarsinnaanerannut neqerooruteqartoqarnissaa. Taamaammat Borgmester Asii Chemnitz Narup ataatsimeeqatigiumallugu aggersassavara taamaalilluta immitsinnut qanoq naatsorsuutiginninnerput ersarissarniassagatsigu aammalu allattoqarfitta suliassaqarfik sukumiisumik suliaralugu aallartissinnaaniassammassuk.

Inussiarnersumik inuulluaqqusillunga

Siverth K. Heilmann,
Ineqarnermut Naalakkersuisoq

 

Suliamut tunngatillugu pappilissat:

Tusagassiorfinnut nalunaarut: Siverth K. Heilmannip isummani aalajangiusimavaa

Tusagassiorfinnut nalunaarut siulleq (qulaaniittoq takuuk), Ineqarnermut Naalakkersuisoqarfiup aamma Kommuneqarfik Sermersuup pineqartoq pillugu allakkiai aamma Danmarkimi Institut for Menneskerettighederimit allakkat ataatsimoortillugit pappialanngorlugit. (pdf)
(Tusagassiorfinnut nalunaarut eqqaassanngikkaanni allakkiat sinneri qallunaatut allaqqapput).

Naaja Nathanielsenip (IA) tarnimikkut napparsimasut Namminersorlutik Oqartussat inissiaataaniittut pillugit §37 naapertorlugu apeqquteqaataanut Ineqarnermut Naalakkersuisup Siverth K. Heilmannip akissutaa. (pdf)
(Kalaallisut qallunaatullu allaqqavoq).