Unammineq Qujanaq atuaqatigiinnit soqutigineqarluartoq

Avatangiisinut Pinngortitamullu Naalakkersuisup Kim Kielsenip nuannaarutigaa, atuartut paasititsiniaanermi erinarsuut Qujanaq atorlugu videokkut inuulluaaqussusiornissamut unammilligassaq tigulluarsimammassuk.

Atuartut paasititsiniaanermi erinarsuut Qujanaq atorlugu videokkut inuulluaqqussummik pitsaanerpaamik suliaqartitsiniarluni unammititsinermut peqataalluarput, aammalu videonik ingerlaavartumik nassiussuillutik.

- Atuartut unammilligassaq tigulluarsimagaat, aammalu videonik nuannersorpassuarnik uatsinnut nassiussuinerat takullugu nuannerpoq. Maannamut atuartunit videoliat 13-it tiguavut, videollu tamaasa takunissaat pissanganarpoq. Julie Berthelsen suleqatigalugu ajugaasussamik toqqaanissannut qilanaarpunga, Avatangiisinut Pinngortitamullu Naalakkersuisoq Kim Kielsen oqarpoq.

- Atuartut paasititsiniaanermi erinarsuut Qujanaq atorlugu videokkut inuulluaqqussusiornissamut unammilligassamik tigusilluarneranni, aamma meeqqat avatangiisitsinnik pinngortitamillu paarsinissamik soqutiginninnerat takutinneqarpoq. Ajugaasut septembarip naanerani toqqarneqassapput, taamaattumillu suli unammititsinermut peqataanissamut piffissaqarluarpoq, Kim Kielsen nangippoq.

- Tamatuma saniatigut unammititsineq tamarmiusoq soqutigineqarluartoq malugaarput, facebookikkullu nittartagarput ullormiit ullormut alliartorpoq. Maannamut likes-it 2350-it sinnerlugit pissarsiarisimavagut, taakkulu amerlalluinnarput. Aamma soqutiginnittunit allanit videokkut inuulluaqqussutinik arlalinnik pissarsivugut.

- Naalakkersuisoqarfik unammititsinerup saniatigut Maniitsumi Nuummilu nipilersorluni tusarnaartitsinernit videoliortitsivoq. Taanna Qujanaq-p facebookikkut nittartagaaniippoq, maannamullu 7000-it sinnerlugit takuneqarsimalluni.

Erinarsuummi eqqaavimmik atuisut, aammalu Kalaallit Nunaanni avatangiisinik pinngortitamillu paarseqataasut annertuumik qutsavigineqarput.

Attaveqarfissaq: Paasissutissiisartoq Bula Larsen, Tlf.: (+299) 34 54 23, Tlf.: (+299) 59 39 58

 

Asseq siulleq: Avatangiisinut Pinngortitamullu Naalakkersuisoq Kim Kielsen Nuuk Center-imi tusarnaatitsinermit tikilluaqqusisoq

Assit tulliat: Maniitsumi, Atuarfik Kilaaseeraq-miit atuartut pissangallutik Julie Berthelsen-ilu tusarnaartitsininssaminnut utaqqisut

Assit pingajuat: Atuartut nuannaartut Nuussuarmi Nuussup Atuarfianinngaanneersut Julie Berthelsen erinarsoqatigigaat