Siverth K. Heilmannip isummani aalajangiusimavaa

 

Nuannaarutigaara, Kommuneqarfik Sermersuup tarnimikkut nappaatillit amigartumik iliuuseqarfigineqartarnerat pillugu apeqqut tusagassiuutitigut saqqummiummagu.

Inuiaqatigiinni tarnimikkut nappaatillittavut qanoq iliuuseqarfigisinnaanerlutigit oqaloqatigiinnissaq pingaaruteqarpoq – tassaappummi akornatsinni sanngiinnerpaanut ilaasut, imminnut ikiorsinnaanngitsut, inuiaqatigiinnillu ikiorneqarnissaminnik pisariaqartitsisut.

Tarnimikkut nappaatillit ikiorneqartannginnerannik ajornartorsiuteqarneq annertusiartorpoq. Taamaattumik A/S Inissiaatileqatigiiffik INI-p (INI) Ineqarnermut Naalakkersuisoqarfik qinnuigisimavaa, ajornartorsiut taanna Kommuneqarfik Sermersuumut saqqummiuteqqullugu. Kommunimut allakkami pisut aalajangersimasut, tassalu tarnimikkut nappaatillit imminnut eqqaamiuminnullu ajornartorsiortitsisut innersuussutigineqarput.

INI-mit misigineqartarpoq, tarnimikkut nappaatillit imminnut isumagisinnaasut Kommune naliliisimasoq. Pissutsit taamaattarput, naak massa tarnimikkut nappaateqartut pisut ilaanni piffissap sivisuup ingerlanerani eqqaamiuminnut qunusaarisarsimasut aammalu taamaalillutik imminnut eqqaamiuminnullu navianartorsiortitsisinnaasartut, taamatuttaaq illuutit innarlernissaannut aarlerinartorsiortoqartartoq (ikuallatoorneq ikkuffilersorfiit aserorterneqarneri)

Pisut ilaanni tarnimigut nappaatilik eqqaamiuminut qununartumik pissusilersorsimatillugu, imminut avatangiisiminullu ulorianartorsiortitsisimatillugu imaluunniit inuunermik ulorianartorsiortitsisimatillugit imaluunniit inissiaqarfimmi aserorterisimatillugit tarnimigullu nappaatilik ulorianartorsiortitsigaluartoq kommunimit ikiorserneqanngippat, tarnimigut nappaatillip inissiamit anisinneqarnissaata saniatigut INI allamik periarfissaqanngilaq.

Attartortumik inissiamit anisitsisarneq suliaavoq oqitsuunngitsoq – tamanna aatsaat sanilit arlallit arlaleriarlutik maalaaruteqareernerisigut, aammalu Eqqartuussivimmut tunngavilersorluakkamik uppernarsaatissaqarpat pisinnaasarpoq. Piffissami sivisuumi eqqaamiut amerlasuut annilaangasarput, aammalu inissiaq najugartik toqqissisimaffissaraluartik toqqissisimaffiginagu inuusarlutik.


Taamaammat assut kissaatigaara Kommunep, Namminersorlutik Oqartussat, INI aammalu Iserit suleqatigalugit siunissami qanoq periaaseqartarnissaq qimerluussagaa, taamaaliornikkut inissianik attartortut imaluunniit tarnimikkut nappaateqartut artukkerneqannginnissaat eqqakattarineqartutullu inissinnginnissaat qulakkeersinnaajumallugu. Pisortat pisussaaffeqarput tarnimikkut napparsimasut aammalu ineqartut allat ileqqorissaarfigalugit atugaqartissallugit.

Inussiarnersumik inuulluaqqusillunga

Siverth K. Heilmann