Internetsikkut kiffartuussineq namminersortunngorsaavigineqarpoq

 

Internetsikkut paasissutissiisarnikkullu kiffartuussinerit Kalaallit Nunaanni tamarmi 1. november 2014 aallarnerfigalugu namminersortunngorsaavigineqarput. Kiffartuussisut nutaat TELE-POST-itut atugassaqartitaallutik internetsikkut paasissutissiisarnikkullu kiffartuussinernik atuisunut kiffartuussiumallutik unammilleqataasinnaanngorput attaviit aalajangersimasunik silaannakkoortunilu.

Tassa imaappoq ADSL-imik atortorissaarutit kiffartuussisunit nutaanit kiffartuussanut neqeroorutigineqarsinnaanngortut, naak siusinnerusukkut kiffartuussisut nutaat kabilit atornagit silaannakkut attaveqaatinik atuisartussaasimagaluartut.

-”Kiffartuussisut nutaat atuisunut iluaqutaasumik internetsikkut paasissutissiisarnikkullu kiffartuussinernik ajornannginnerusumik neqerooruteqarsinnaalernerat nuannaarutigaara. Internetsikkut kiffartuussinermi unammillernertaqanngitsumik ullut tamaasa ingerlatsineq inuiaqatigiinnut akisuujuvoq, atuisullu toqqaanissaminnut ikinnerusunik periarfissaqartillugit”, Peqqissutsimut Attaveqarnermullu Naalakkersuisoq Steen Lynge oqarpoq nangillunilu:

 -”Atuisut telekkut kiffartuussinernut pisariaqartitaminnut naleqqunnerpaanik toqqaanissaminnut periarfissaqalernerat unammilleqatigiinnerup qulakkiissavaa, Kalaallit Nunaanni tamarmi atuisut telekkut kiffartuussinernik pitsaasunik akikitsunillu pissaqartinneqarnissaat TELE-POST-ip suli pisussaaffigissavaa.”

Illoqarfinni nunaqarfinnilu kabileqartitsineq kiisalu radiokkut, imaatigut kabilitigut qaammataasatigullu illoqarfiit, nunaqarfiit nunallu allat akornanni aallakaatitsinikkut attaveqaatit TELE-POST-ip akuersissummik peqarfigissavai. Taamaattumik  TELE-POST-ip kiffartuussisut nutaat attaveqaatitit taakku atorlugit telekkut kiffartuussinernik pilersuinissaannut periarfissamik ammaatissavai.

Steen Lynge nangilluni oqarpoq: ”Kalaallit Nunaanni telekkut attaveqaatinik piorsaajuarnissarput pingaartuuvoq, taamaalilluta Kalaallit Nunaata digitaliusunik atortulersorneqarnera nukittorsarsinnaaniassagatsigu. Taamaattumik TELE-POST-ip imaatigut kabilimik Nuup avannaani annertusaanissamik pilersaaruteqarnera assut soqutigalugu malinnaaffigaara.”

”Telep namminersortunngorsarneqarneranut sinnaakkutissat”-nik suliniut Naalakkersuisunut ilaasortap Steen Lyngep 2013-imi upernaakkut aallarnisarpaa, tassanilu  internetsikkut kabelit atornagit kiffartuussinerit namminersortunngorsarneqar­nerisa kingunerisaannik ilorraap tungaanut ineriartornerup qanoq iliorluni ingerlateqqin­ne­qar­sinnaanera eqqarsaatigalugu periaasissaq suliarineqartussaalluni. Periaaseq taanna 2018-ip tungaanoortuuvoq, atuisullu telekkut kiffartuussinernik akikinnerusunik pitsaanerusunillu qulakkeerunneqarnissaannik suleriaqqinnermi nalerassalersuisuulluni.

Internetsikkut kiffartuussinernik namminersortunngorsaaviginninneq telekkut atugassanik pitsaanerusunik akikinnerusunillu peqalernissamut alloriarneruvoq siulleq. Alloriarnerup tullia 2016-imi pissaaq, tassanilu mobilinik oqarasuaatinullu aalajangersimasumik attaveqaatinik atuinermi kiffartuussinerup namminersortunngorsaavigineqarnissaa naatsorsuutigineqarpoq.

 

 

Paasissutissat amerlanerusut pissarsiarerusukkaanni Peqqissutsimut Attaveqarnermullu Naalakkersuisoq Steen Lynge una aqqutigalugu attaveqarfigineqarsinnaavoq: Naalakkersuisup allattaa Lea Holm, oqarasuaat +299 55 33 03 imaluunniit email lea@nanoq.gl