Naalakkersuisut TNGG pillugu nuannaarput

Aatsitassarsiorfimmut suliassamut aningaasalersuinermi aatsitassanut periusissami anguniakkat anguneqarnissaat qulakkeerneqarpoq.

Qeqertarsuatsiaat eqqaanni rubinisiorfissamut aningaasalersuinissamik angusaqarneq pillugu True North Gems Greenland-imit ullumi nutaarsiassaq Naalakkersuisut qujaruppaat, peqatigisaanillu aatsitassanut periusissami ukioq manna siusinnerusukkut tamanut saqqummiunneqartumi anguniakkat ilaannik suli allamik angusaqarneq nuannaarutigalugu.

Kalaallit Nunaanni aatsitassarsiorfimmik ingerlatsineq ajornanngilluinnartoq, nutaarsiassaq nunarsuarmut avatangiisumut aammalu aningaasaliisartunut sakkortuumik takussutissiivoq.

Rubinisiorfik safirisiorfillu aatsitassarsiorfiit kaaviiaartitanit royalty-mik atugassaqartitsiviulluni aallartinneqartut siullersaraat.

Kalaallit Nunaanni aatsitassarsiorfimmik ingerlatsinermut royalty-mik atugassaqartitsinissaq tassarpiaavoq Inuussutissarsiornermut Aatsitassanullu Naalakkersuisup Jens-Erik Kirkegaard-ip suliassatut pingaartitarisaa, tassami tassani aatsitassanik tunisisoqarneri tamaasa nunap karsiata isertitaqarnissaa qulakkeerneqarpoq.

Inuussutissarsiornermut Aatsitassanullu Naalakkersusisoq Jens-Erik Kirkegaard oqarpoq:

”Naalakkersuisut tungaanniit nutaarsiassaq nuannersoq naammagisimaartorujussuuarput. Nutaarsiassami takutinneqarpoq royaltymut tunngatillugu allannguinerit kissaatigisavut aammalu tamatuma kingorna periusissaq ingerlassimasarput, niuerfimmi unammilleqatigiiffiusorujussuugaluartumiluunniit ajornanngitsut piviusorsiortullu.”

Aatsitassanut suliassaqarfimmiinnaanngitsoq, kisiannili aamma Suliffeqarnermut suliassaqarfimmut, Naalakkersuisutut akisussaasuusutut suliffissaqartitsiniarnermi kaamisaanissamut periarfissaqalernera nuannaarutigineqarpoq.

Suliassamut soqutiginnillutik qinnuteqartorpassuit piumassuseqartut takutitsisimanerat neriulluarnarpoq. Tamanna isumalluarnarpoq, aamma aatsitassarsiorfinnut suliassaalertartussanut.

True North Gems-ip, Kommuneqarfik Sermersuup aamma Namminersorlutik Oqartussat IBA-mut isumaqatigiissutaanni naammassillugu isumaqatiginninniutigineqareersumi, taamatuttaaq suliffissaaleqinermik akiuiniarnissamut suliniutit arlallit ilaatinneqarput.

Assersuutigalugu 2016 aallarnerfigalugu ilinniartitaanermut suliniutinut 1 mio. koruunit immikkoortinneqartalissapput.

Tamatuma saniatigut ingerlatseqatigiiffik pisussanut pilersaarutinik nunaqavissunik sulisoqarnermi siuarsaasussanik suliaqarnissamut pisussaaffeqalerpoq.

Ujaqqanik silisisarnermut pikkorissaarinerit aamma najukkami silisisarfimmik pilersitseqqinnissaq taakkua ilagiinnarpaat.

True North Gems IBA-mut isumaqatigiissut aqqutigalugu ilinniartunut sungiusarfissanik 5-inik immikkoortitsilluni qulakkeerereerpoq, aammalu aatsitassarsiorfimmi eqqaanilu sulisussat 80-iusut amerlanerpaartaat nunaqavissuussasut naatsorsuutigineqarpoq.

Isumaqatigiissutit arlallit aatsitassarsiorfimmut tunngassuteqartut, ilanngullugit ingerlasussanik piareersaasarneq, aatsitassarsiorfimmut kiffartuussinerit aamma ikummatissanik pilersuinerit, suliffeqarfinnut kalaallinit pigineqartunut suliakkiissutissatut immikkoortinneqareerput.