Sanaartornermut aserfallatsaaliuinermullu aningaasaliissutit agguarneqarput

Naalakkersuisut suliffissaaleqisunut immikkut iliuuseqarnerannut atatillugu sanaartornermut aserfallatsaaliuinermullu immikkut ittumik aningaasaliissutit agguataarneqarneri pillugit Inuussutissarsiornermut Aatsitassanullu Naalakkersuisoq Jens-Erik Kirkegaard maanna erseqqissumik nalunaaruteqarsinnaalerpoq,taannami suliniutinut ataqatigiissaarisuuvoq. Aamma suliffissaaleqisunut immikkut ittumik iliuuseqarnermi suliniutinut killiffiat pillugu saqqummiussaqassalluni.

Immikkut aningaasaliissutit 174,2 mio.kr. Sanaartornermut aserfallatsaaliuinermullu atorneqartussat aallartisarneqarpata sapinngisamik suliffissaaleqisunut suliffissanik amerlanerpaanik pilersitsissapput. 2014-imi juli qaammat suliffissarsiortutut nalunaarsukkat 3.360-iupput. Ukioq kingulleq piffissaq taamaalisoq suliffissarsiortutut nalunaarsukkat 3.382-iusut. Suliffissarsiortut nalunaarsukkat 22-nik ikileriaateqarput. 

174,2 mio.kr. kommunini sanaartornermut aserfallatsaaliuinermullu suliniutinut imatut agguarneqarput:

1. Kommune Kujalleq:                                                                            28,5 mio.kr. 
2. Kommuneqarfik Sermersooq:                                                              44,3 mio. kr.
3. Qeqqata Kommunia:                                                                           28,2 mio. kr.
4. Qaasuitsup Kommunia:                                                                       58,2 mio. kr.
5. Nunaqarfinni isorliunerusunilu najugaqarnermut pilersarut                     10 mio.kr.
6. Nuna tamakkerlugu aserfallatsaaliuineq                                               5 mio. kr.

Nunaqarfinnut isorliunerusunullu aningaasat 10 mio.kr. immikkoortinneqarput, taakku najugaqarnermut pilersaarutinut atorneqassapput. Tassa illuliassanut (illorput 2100inut) katillugit arfineq pingasunut aningaasaliisutit atorneqarput. Nunaqarfinni maaji qaammat allagarsiisoqarpoq illuliassanut taakkununnga qinnuteqartoqarsinnaasoq. Qaasuitsup kommunianit Qeqqata Kommunianiillu qinnuteqaatit sisamat tiguneqarput, qinnuteqartunullu piumasaqaatit naammassineqarsimallutik. Aamma Qaasuitsumit kujataaniilli qinnuteqaatit qulit tiguneqarput, qinnuteqaateqartunullu ilassutitut paasissutissat suli pissarsiarineqaqqaartariaqarput.

Aserfallatsaaliuinermut aningaasaliissutit 5 mio.kr. illoqarfinni oqummut iluarsaassinernut atorneqassapput. Suliniutit inissiaatileqatigiiffik A/S INI peqatigalugu suliarineqassapput, illoqarfinnilu ataasiakkaani INIp immikkoortortaqarfiiniit kissaatigineqartut paasiniarneqartassapput. Maniitsumi Ilulissanilu suliniutissatut siunnersuutit maannamut tiguneqareerput. Illoqarfinnilu allani suliniuteqartoqassasoq naatsorsuutigineqarpoq.

Sanaartornermut aserfallatsaaliuinermullu immikkut ittumik aningaasaliissutit saniatigut aamma suliffissaaleqisunut immikkut ittumik iliuuseqarneq ingerlanneqarpoq, kommunit suleqatigalugit suliffissaaleqisunut 2014imi pikkorissaanerit pilersaarusiorneqarlutillu ingerlanneqarsimapput. Namminersorlutik Oqartussat 25.mio.kr. missaannik aningaasaliissuteqarput, kommuniniillu aamma 10 mio.kr. –inik aningaasaleeqataassuteqartoqarluni.

Suliniutit Piareersarfinni atuagarsornertalimmik pikkorissartitsinerupput, paasisaqarnerunissamut pikkorissartitsinerit, piginnaanngorsaqqiinernut, suliffimmik sungiussiartornissamut aamma sannavinni suliniutinut sammipput, inuusuttullu 30-it inorlugit ukiullit immikkut aallunneqarlutik. 

Suliffissaaleqisut piffissap ingerlanerani aatsitassarsiornerup iluani immikkut sulisinnaasutut ilinniagaqalernissaat anguniarlugu atuagarsorluni pikkorissaanerit tassunga samminerupput. Inuusuttunut sannavinni suliniutit aamma atuagarsorluni pikkorissartitsinerit iliuusaapput sivittajaamik ingerlanneqartussat, taakkualu ilinniagaqalernissamut imaluunniit suliffeqarfinni sulilernissamut piginnaanngortitsissapput.

Suliffissaaleqisunut immikkut ittumik iliuuseqarnissamut atatillugu suliffissaaleqisut katillugit 714-it pikkorissartitsinernut assigiinngitsunut peqataareersimalerput.

"Suliniutit makku piginnaanngorsarfiussapput, piginnaasat inuussutissarsiutinik ingerlaqartut aamma aatsitassarsiorlutik ingerlatsisut ujartugaat. Kisianni aamma inuusuttut aalajangersimasumik ingerlatamik naammassinninnissaannut aqqutissiuussissapput, soorlu ilinnialeqqinnissamut imaluunniit suliffeqalernissamut piginnaanngirsarnerisigut, Inuussutissarsiornermut Aatsitassanullu Naalakkersuisoq Jens-Erik Kirkegaard oqarpoq.


Inuussutissarsiornermut Aatsitassanullu Naalakkersuisoq Jens-Erik Kirkegaard annerusumik oqaaseqartinniaraanni attavissaq: Naalakkersuisup allattaa Kirsten Enequist: +299 34 65 04.