Naalakkersuisoq ilumuunnginneraavoq allaaserisamillu uterteqqusilluni

JEK 300114

Inuussutissarsiornermut Aatsitassanullu Naalakkersuisoq ilumuunnginneraavoq Sermitsiaq.ag-imilu allaaserisap ” Kirkegaard afviser exit: jeg bliver som naalakkersuisoq” uterteqquneqarnissaa piumasaralugu. 

Allaaserisaq paasisitsinerluppoq ajoqusiilluni, narrunarsaalluni, aamma Naalakkersuisumut ataqqinninnermik innarliivoq, qinikkatummi tatiginassuseqarnissaq piumasaqaataavoq. Aviisimit oqaluttuariniarneqartup saqqummiutinnginnerani misilinneqarluaqqaarsimanngilaq, allaat oqaluttuamut takussutissamik Inuussutissarsiornermut Aatsitassanullu Naalakkersuisumut Jens-Erik Kirkegaardimut saqqummiussisoqaqqaarsimanani.

”Sermitsiaq.ag-ip nittartagaani oqaluttualiaq akuerisinnaanngilara, Naalakkersuisutut atorfinnut ajoqusiiginnarpoq. Aamma tusagassiortutut ileqqorissaarnissamik malerugassanut uniuuppoq, tassami takussutissaqanngilaq, misissuisoqaqqaarsimanngilaq inummilluunniit allamit tatiginartumik oqaaseqaammik pissarsisoqarsimanani”, Inuussutissarsiornermut Aatsitassanullu Naalakkersuisoq Jens-Erik Kirkegaard oqarpoq.

Naalakkersuisup aviisi kaammattorumavaa tusagassioriaatsiminnik nalilersueqqullugit aamma tusagassiuinermi ileqqorissaarnissamut maleruagassat eqqarsaatigeqqeqqullugit, tassami nittartakkami oqaluttuarisaq tusagassiortutut pitsaasumik mississueqqissaarsimanermik amigaateqarmat, takussutissaqarani, tatiginartumiillu allamit oqaaseqartitsisoqarsimanani. Eqqortumik paasissutissiinermik saqqummiussisoqanngilaq. Oqaluttuariniagarlu saqqummiussimasariaqanngikkaluarpoq.

Naalakkersuisoq Jens-Erik Kirkegaard oqaluttuamut tunngatillugu annerusumik oqaaseqarusunngilaq.