Avaleraasartuut 77.000 tonsit pisarineqarput

Stemningsbillede


Aalisariutit nunatsinneersut 18-init missaanniittut Tunumi misileraalluni avaleraasartoorniartut, avaleraasartuut 77.378 tonsit septembarip qulingannut aalisarsimavaat.

Aalisarnermut, Piniarnermut Nunalerinermullu Naalakkersuisoqarfik aggustip 29-anni ilisimatitsivoq aalisariutit avaleraasartuut ukioq manna 65.000 tonsit pisarisimagaat, tamannalu nunatta aalisarnermik oqaluttuarisaanerani aatsaat taama amerlatigisunik avaleraasartoornerarlugu.

Avaleraasartuut aggustip 29-annit maannamut 12.000 tonsit aalisarneqarsimalerput.

Avaleraasartuut aggustip 30-annit septembarip qulingannut ulloq unnuarlu pisarineqartut 443 tonsinit 1.359 tonsinut  amerlassuseqartarput.

Maannamut suli avaleraasartoorniartoqarpoq. Misileraanermi pisassiissutit 100.000 tonsiupput. Siorna avaleraasartoorniarneq septembarip 19-anni unitsinneqarpoq.

 

Ammassassuit

Aalisariutit misileraalluni avaleraasartoorniarnermi aalisaqataasut pisassaminnillu aalisareersimasut, Tunumi misileraalluni ammassassuarniarnermut aallarteqqammersumut aalisaqataapput. Misileraalluni ammassassuarniarneq misileraalluni avaleraasartoorniarnermut ilaavoq.

Ammassassuit misileraalluni aalisarneqarsinnaasut 15.000 tonsiupput. Aalisariutit maannamut 500 tonsit pisarisimavaat.

 

Attavigineqarsinnaavoq Jørgen Isak Olsen, Naalakkersuisoqarfimmi pisortaq: Email: jio@nanoq.gl