Nunatta Washington D.C.-mi Sinniisoqarfia ammalersoq

Aleqa Hammond holder pressemøde

Pingasunngorneq ulloq 24. september 2014 Naalakkersuisut Siulittaasuat Aleqa Hammond Washington D.C.-miissaaq, Nunatta USA-mi Sinniisoqarfia pisortatigoortumik ammarnersioriartorlugu.

Nunatta Washington D.C.-mi Sinniisoqarfiata ammarneqarnera ukiuni aggersuni ilaatigut Ameerikkap Avannaanut niuernikkut avammut tunisassiornermut iluaqutaassaaq Nunatsinnilu suliffeqarfinnik pilersitsinissap qulakkeerneqarnissaanut Nunatsinni aningaasaliisussanik kajuminnilersitsissalluni, niuerfiusinnaasunik nutaanik nassaarniarnissamut iluaqutaassaluni  USA-lu suleqatigalugu ilinniartitaanikkut ilisimatusarnikkullu suleqatigiinnermut periarfissanik annertunerusunik aammaassinerussalluni.

Nunatta USA-mi Sinniisoqarfissaanik ammaanissaq 2013-imi ukiakkut Inatsisartut ataatsimiinneranni isumaqatiginninniutigineqarpoq, Namminersorlutillu Oqartussat Nunatta aningaasaqarnikkut imminut napatinnissaata qulakkeerneqarnissaanik suliaqarnermi alloriarnertut pingaarutilittut isigineqassalluni.

Nunatta Københavnimi Sinniisoqarfiata nunap sinniisaatut inissisimanngitsup saniatigut, Nunatta Washington D.C.-mi Sinniisoqarfia tassaalissaaq, 1992-imi Nunatta Sinniisoqarfiata Bruxellesimi ammarneqarnerata kingorna sinniisoqarfiit ammarneqartut siullersaat.

Bruxellesimi Sinniisoqarfiup takutippaa, suleqatigiinnissap tungaatigut qasusuilluni nukimmik atuinerup kiisalu nunani allani aalajangiisartut qanimut attaviginerisigut qanoq inuiaqatigiinnut kalaallinut pitsaasumik kinguneqarsinnaanerat. EU-mit ukiumoortumik Nunatta Karsianut 320 mio. kruunit missaannik tapiissuteqartarnikkut taamaasilluni EU ullumi tassaavoq Nunatta suleqataa pingaarutilerujussuaq.

Nunatta Washington D.C.-mi Sinniisoqarfiata Nunatta USA-llu niueqatigiinnikkut aningaasaqarnikkullu suleqatigiinnerata annertusarneqarnissaa sulissutigissavaa kiisalu ilisimatusarnerup, ilinniagaqarnerup, nunap inoqqaavinut tunngasutigut, kulturikkut, tunisassiornikkut il.il. suleqatigiinneq annertusassavai.

Naalakkersuisut Siulittaasuat Washington D.C.-mi tikeraarnermini USA-mi nunanut allanut ministereqarfimmi (State Department) ataatsimeeqateqassaaq kiisalu Issittumi Admiralitut Issittumut tunngasunik nunallu Issittumiittut allat suleqatiginissaannut USA-p nunanut allanut ministerianit John Kerrymit toqqarneqaqqammersoq Robert Papp naapissallugu.

Naalakkersuisut Siulittaasuata Washington D.C.-mi ulloq 24. september tikeraarnerminut atatillugu, ameerikkamiut eqqarsaqatigiittartut siuttut ilaat Brookings, taakkua Nunarput pillugu nalunaarusiaata Nunattalu uuliamik aatsitassanillu pisuussutai pillugit pisortatigoortumik saqqummersitsineq ullormi pineqartumi tamarmik ataatsikkut pisussat ammarnersiorneqarneranni oqalugiartuussaaq. Brookings tassaavoq ameerikkamiut eqqarsaqatigiittartut arlallit ilaat, Issittoq pillugu annertusiartortumik soqutigisaqartoq.

USA-mi tikeraarneq naggaserlugu USA-mi pisortat sinniisaat peqatigalugit, Nunatta Sinniisoqarfia pisortatigoortumik ilasseqatigiissitsinikkut atoqqaarfissiortinneqassaaq.

Aleqa Hammond

Paasisaqarnerorusuttut saaffigisinnaavaat Sinniisoqarfimmi Pisortaq Inuuteq Holm Olsen, Nunatta Washington D.C.-mi Sinniisoqarfia, oqarasuaat +1 202 2344300 imaluunniit e-mail inol@nanoq.gl.