Kalaallit Nunaat Osaka-mi

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen sapaatip akunnerani qaangiuttumi pisortatigoortumik Japan-imut tikeraarpoq.

Tikeraarneq taanna japanimiut viceminister-iata Itus-ip aggusti qaammat Nuummut tikeraarneranut atasumik aaqqissuussaavoq, nunatsinniillu decembarimi Japan-imut Naalakkersuisut siulittaasuata Aleqa Hammond-ip Naalakkersuisunullu ilaasortat marluk danskit kunngikkormiuinik ilaqarlutik tikeraarnissaannut siulequtaalluni.

Tikeraarneq aallarnerneqarpoq Osaka-mi, tassani Nick Nielsen kalaallit suliaannik immikkut saqqummersitsinermi National Ethnology Museum-imi ingerlanneqartumi peqataavoq, kajsarikkormiutut ataqqinartorsuaq prinsesse Takamado peqatigalugu.

Prinsesse taanna 1996-imi Kalaallit Nunaanni ilisarisimaneqalerpoq taamani uini, - maanna toqoreersoq, peqatigalugu nunatsinnut tikeraarnerminut atatillugu.

Kajsarikkormiutut ataqqinartorsuup taassuma taamani tikeraarnini isumassarsiffigilluarpaa, tassami atuakkiorpoq atsikkaminik Lulie Iluliaq, atuakkiaalu taanna maani nunatsinni nunanilu allani meeqqanit ilisimaneqalerpoq nuannarineqaqalunilu.

Saqqummersitsinermik ammaanersiornermut atatillugu kalaallit eqqumiitsuliortut marluk, Maqe Bianco aamma Nukannguaq Zeeb qilaatsersorlutik guitarimillu nipilersorlutik taku-titsipput.

Tamatumunngalu atatillugu Nick Nielsen oqaaseqarpoq:

”Kalaallit eqqumiitsuliortut inimi saqqummersitsiviusumi namminermi takutitsinerat kusanartoq isumaqarpunga misigisaasoq imaannaanngitsoq, takutissivigaammi ini saqqummersitsiviusoq kajsarikkormiut ilaqutariit Tupilannik kusanartunik katersaannik avatangiisilik. Japanimiut tupilannut qilaatsersortunullu soqutiginninnerujussuat imaannaanngilaq, - tassami eqqarsarnaqaaq uagut kalaallit ileqqugut oqaluttuaatsigullu inuiannit taamak ungasitsigisumi najugalinnit qiimmattaatigineqartut isigalugu.”

Naalakkersuisorlu ingerlaqqippoq:

”Nunatta katersugaasivissua nersortariaqarpoq – danskit katersugaasivissuat aamma Osaka-mi katersugaasivik suleqatigalugit saqqummersitsinermik aaqqissuussisimammata, tassuunami nunatsinni oqaluttuarisaaneq eqqumiitsuliornikkullu piginnaasat ilisaritinneqarmata.”