Umiarsuarnik sinersorluni takornariartaateqarneq annertusarneqassaaq

Naalakkersuisut Nunatsinni takornariaqarnermik inuussutissarsiuteqarnerup pitsaasumik ineriartortinneqarnissaata qulakkeerneqarnissaa annertuumik sammisaraat.

Ukiuni kingullerni takornariat tikittartut amerliartornerisa unikaallannerat misigaarput, umiarsuarnillu sinersorluni takornariartaatit tikittartut ikileriarujussuarsimallutik.

Nunatsinni takornariaqarnikkut akitsuutit Nunatta unammillersinnaassusaa sanngiillisissimavaa, Nunatsinnullu takornariarnissaq naleqqutinngitsumik akisuallaalersissimallugu.

Misissueqqissaarnermi Inuussutissarsiornermut, Aatsitassaqarnermut Suliffeqarnermullu Naalakkersuisoqarfiup suliarisimasaani ersarippoq, Nunarput timmisartunut attartukkanut umiarsuarnullu sinersorluni takornariartaatinut akit tungaasigut nunani sanilerisatsinni akigitinneqartunut sanilliullugu akisunerujussuusoq.

Taamaattumik Nunatta unammillersinnaassusaa nukittorsarniarlugu Naalakkersuisut Inatsisartut ukiakkut 2014-imi ataatsimiinneranni umiarsuarnut takornariartaatinut akitsuutit appartinneqarnissaannut siunnersuummik saqqummiussaqarniarput, taamaasilluni Nunatsinni akit Islandimi, ukiuni kingullerni takornariartartut amerlassusaannut tunngatillugu qaffariarujussuarnermik misigisaqarsimasumut akinut tunngatillugu sanillersuunneqarsinnaasunngorlugit.

Visit Greenlandip ingerlatseqatigiiffiup suliassaa pingaarneq, tassalu Nunatta nittarsaanneqarnissaa annertuumik suliaraa. Taamaattumik akitsuutinik appartitsinissaq Visit Greenlandip kiffartuussinissamik isumaqatigiissutaanik, 2015-imi aamma 13.911.000 kruuniusussanik, ilanngartuinikkut pinngilaq. 1,6 mio. kruunit pineqartut akitsuutinik aningaasalersuutaasussanik tapertaasussat tassaapput assassorluni eqqumiitsulianik nittarsaassinissamut misigisassarsiorlunilu takornariaqarnermik inuussutissarsiuteqarnerup siuarsarneqarnissaanut immikkut ittumik iliuuseqartoqarnissaanut aningaasaliissutigineqareersimasunit tiguneqarsimapput.

Aningaasaliissutit taakkua takornariaqarnerup iluani atugassarititanut killissarititaasussanut nukittorsaatissatut illuartinneqartassapput.

Taamaattumik Naalakkersuisut Visit Greenlandip kiffartuussinermut isumaqatigiissutaanut aningaasaliissutaasa sipaarutigineqarnerat uani pineqanngilaq.