Kommunit iluarsaassilersut

Inatsisit allattorsimaffii atuuttussanngortinneqarlutillu saqqummiunneqartartut misissornerini Naalakkersuisut Siulittaasuata Naalakkersuisoqarfiani Inatsiseqarnermut Immikkoortortamit paasineqarpoq, kommuneni ileqqoreqqusat kommunit aaqqissuuteqqinneqannginneranni atuutilersinneqarsimasut atortuutinneqarsinnaanngitsut.

Taamaammat kommunit nalilersuisussanngorput kommuneni ileqqoreqqusat pisoqqat suli pisariaqarnersut.

Ileqqoreqqusammi suli pisariaqarpata aatsaalloorluni kommunenit atuutilersinneqartariaqarput.

- Kommunit suliassarpassuaqarmata nalunngilarput. Taamaammat ileqqoreqqusat pisoqqat misissornissaannut piffissaqarniassammata ukiup affaanik piffissalerpavut, taama Kim Blokbo, Naalakkersuisut Siulittaasuata Naalakkersuisoqarfiani inatsisilerinermi pisortaq, oqarpoq nangillunilu:

- Ileqqoreqqusat suliareqqinnerinut ilanngullugu inatsit atuuttussanngortinneqartut saqqummiunneqartarnerannut suleriueq assigiissarneqassaaq, taamaalilluni Kalaallit Nunaanni inatsisinik innuttaasut misissuisinnaanerat siunissami pitsanngoriaateqangaatsiassalluni.

Qaasuitsup Kommunia, Qeqqata Kommunia, Kommuneqarfik Sermersooq aamma Kommune Kujalleq taamaammat kommuneni ileqqoreqqusanik misissuinissamut, pisariaqarpallu kommuniusimasunit ileqqoreqqusaliat atuutsilernissaannut 2015-imi marsip tungaanut piffissalerneqarput. Piffissaliussap kingorna kommunit aaqqissuuteqqinnginneranni ileqqoreqqusaliat allattorsimaffinnit assigiinngitsunit peerneqassapput.

- Ileqqoreqqusaliat tamarmik ataasiakkaarlugit atuutilerseqqinneqassapput. Kommunini ileqqoreqqusaliat pisoqqat atuutsiinnarniarlugit tamarmik ataatsikkut atuutilerseqqinniarlugit kommunalbestyrelset aalajangiisinneqarsinnaanngillat. Taamatummi aalajangerneq inatsisitigut isumannaatsuunissaq qulakkeernavianngilaa, ilumullu atortuunerannik erseqqarissumik takussutissiinaviaratik, Kim Blokbo oqarpoq.

 


Paasisaqarnerorusuttut attavigisinnaavaat inatsiseqarnermi pisortaq Kim Blokbo, Naalakkersuisut Siulittaasuata Naalakkersuisoqarfiat, oqarasuaat 34 50 00 imalt. e-mail: kimb@nanoq.gl