Nunap inoqqaavisa pisinnaatitaaffii sammineqalerput

Naalagaaffiit Peqatigiit Nunap Inoqqaavi pillugit Nunarsuarmioqatigiinnik ataatsimeersuartitsinissaat New Yorkimi 22. aamma 23. september pissaaq.

Naalagaaffiit Peqatigiit 2010-mi ataatsimeersuarneranni nunap inoqqaavi pillugit Nunarsuarmioqatigiit ataatsimeersuassasut aalajangiunneqarpoq. Nunarput ataatsimeersuarnissap piareersarneqarneranut peqataasimavoq nunallu inoqqaavisa pisinnaatitaaffiisa, tassunga ilanngullugu Naalagaaffiit Peqatigiit Nunap Inoqqaaviisa Pisinnaatitaaffii pillugit Nalunaarutaanni anguniakkat sammineqarnissaat aamma sulissutigisimallugu.

2013-imi nunap inoqqaavisa sinniisaat kalaallinit peqataaffigineqartumik saamit illoqarfianni Altami Norgemiittumi Nunarsuarmioqatigiit Ataatsimeersuarnissaannut piareersarlutik ataatsimiipput.

Ataatsimeersuarnermi Altami isumaqatigiissummik taasaq atsiorneqarpoq.

Isumaqatigiissut inassuteqaatinik aalajangersimasunik 43-nik imaqartoq katillugit sisamanik pingaarnerusunik sammisassartalik Nunarsuarmioqatigiit Ataatsimeersuarneranni inaarutaasumik isumaqatigiissutigineqartussatut kissaatigineqarpoq.

Ataatsimeersuareernerup kingorna Altami isumaqatigiissut Inatsisartut Ukiakkut Ataatsimiinneranni 2013-imi oqaluuserineqarpoq, tassanilu ilaatigut qulequttat sisamat siunnersuutigineqartut Nunarsuarmioqatigiit Ataatsimeersuarnissaanni isumaqatiginninniutigineqartussatut ilanngunneqarnissaat siunnersuutigineqarpoq.

Maajimi 2014-imi Naalagaaffiit Peqatigiinni Nunap Inoqqaavisa Oqaloqatigiittarfianni Ataavartumi ataatsimiinnermi Nunarsuarmioqatigiit Ataatsimeersuarnerat annertuumik sammineqarpoq.

Tassani ilaatigut Nunarsuarmioqatigiit Ataatsimeersuarnissaat isumaqatiginninniutigineqaqqippoq, tassunga ilanngullugu nunap inoqqaavisa Nunarsuarmioqatigiit Ataatsimeersuarnissaanni inaarutaasumik isumaqatigiissuteqarnissap isumaqatiginninniutigineqarnissaanut peqataatinneqarnissaat.

Isumaqatiginninniaqqinneq pivoq, naak Nunarsuarmioqatigiit Ataatsimeersuarnissaat Naalagaaffiit Peqatigiit 2012-imi ataatsimeersuarneranni aalajangiunneqareeraluartoq.

Nunarput Naalagaaffiit Peqatigiinni Nunarsuarmioqatigiit Ataatsimeersuarnissaanni inaarutaasumik isumaqatigiissuteqarnissap imarisassaanut isumaqatigiinniarnermi persuarsiorfiunngitsumi juuli aamma august 2014-imi peqataasimavoq.

Taamaattumik Nunap Inoqqaavi pillugit Nunarsuarmioqatigiit Ataatsimeersuarnissaat nunap inoqqaavisa qanoq annertutigisumik sunniuteqartiginissaat pillugu isumaqatigiinniareernerup kingorna pissaaq.

Ulluni makkunani Naalagaaffiit Peqatigiinni naalagaaffiit ilaasortaasut akornanni inaarutaasumik isumaqatigiissutissaq isumaqatiginninniutigineqarpoq, tassanilu Nunatta soqutigisai danskit nunanut allanut ministereqarfia qanimut suleqatigalugu ingerlanneqarput.

Nunarsuarmioqatigiit Ataatsimeersuarneranni Naalakkersuisut Siulittaasuat Aleqa Hammond ”nunap inoqqaavisa pisinnaatitaaffiisa nuna tamakkerlugu najukkanilu atuutsinneqalernissaat” pillugu ulloq 22. september, Naalagaaffiit Peqatigiit allattaanerata silap pissusaa pillugu ataatsimeersuartitsinissaa ullormik ataatsimik sioqqullugu saqqummiussissaaq.

Pingasunngorneq ulloq 24. september Naalakkersuisut Siulittaasuata Nunatta Washington D.C.-mi Sinniisoqarfia pisortatigoortumik ammassavaa.

Paasissutissanik sukumiinerusunik pissarsiniarfigineqarsinnaasoq:
AC-fuldmægtig Uiloq Mulvad Jessen, Nunanut Allanut Pisortaqarfik, oqarasuaat toqqaannartoq: 34 67 08